Accessibility links

якшәмбе, 11 декабрь 2016, Казан вакыты 13:04

Qazanda Quqmara qızınıñ kürgäzmäse açıldı


Dekaber' ayı başında bıyıl da invalidlar unkönlege başlanıp kitte. Bu könnärdä mömkinlekläre çiklängän keşelär iğtibar üzägendä bula dip sanala. Alar öçen törle konsertlar kürsätelä, kürgäzmälär açıla. Ä düşämbe könne Tatarstannıñ sotsial' üseş ministrlıysında açılğan kürgäzmä üzgäräk ide. Ul Quqmara rayonı Waxit awılı qızı Aliä Nigmätcänovanıñ kürgäzmäse ide. Bu çarada sotsial' üseş ministrlığı wäkilläre, Quqmara rayonınıñ sänğät mäktäbe, reabilitatsiä üzäge xezmätkärläre qatnaştı.

Räsmi çığışlar, täbrikläwlär yañğırağanda Aliä komp'yuter artında utırıp tordı. Möläyem, neçkä genä bu qız bala üze çığış yasıy almasa da, anıñ ni äytergä telägänen räsemnäre aşa añlarğa bula ide. Kürgäzmädä Aliä komp'yuterda yasağan räsemnären täqdim itte. 15 kenä yäş buluğa qaramastan ul inde üz eşeneñ ostası bulıp ölgerep kilä. Kürgäzmädä täqdim itelgän räsemnär bik törle ide. Ämma alarnıñ nigezendä mömkinçelekläre çiklängän balanıñ, tatar qızınıñ küñele, anıñ xıyalları yata. Anda Qazan kirmäne, şähär küreneşläre dä, tuğan awıl, tabiğät tä bar. Kürgäzmäne täqdim itüdä qatnaşuçılarğa da Aliä üz qulı belän räsemnär yasap kürsätte. Komp'yuter programmaları yärdämendä yäş rässam 15 minut eçendä itek töşerep birde. Milli bizäklär belän bizälgän iteklär ide alar.

Xäyer, Aliäneñ kürgäzmäläre inde berençe tapqır ütkärelmi. Anıñ icatın keşelär inde yaratıp ölgergän. Düşämbedä açılğan kürgäzmädä dä qıznıñ räsemnäre satu öçen dä quyılğan ide. Aliä turında Quqmara rayonınıñ sänğät mäktäbe uqıtuçısı Rasix Säläxov söyli:

Ul bezneñ mäktäpkä 11 yäşendä kilde. Bik sälätle bala. Ul inde sänğät mäktäbeneñ professionallar bülegendä uqı. Aliä turında Qazan mädäniät häm sänğät institutı wäkilläre inde qızıqsına. Şulay itep, Aliä yuğarı uqu yortına kerergä äzerlänä.

Aliä kebek sälätle, ämma fizik mömkinçelekläre çiklängän balalar tağın bar Quqmarada. Alarnıñ sälätlären üsterü öçen şartlar isä yuq:

15 yıl eşläwçe bezneñ sänğät mäktäbeneñ binası yuq. Ayırım bülmä bar, ämma anda yözdän artıq bala uqı. Bilgele ul bik az. Bez eşlibez, küräsez näticä dä bar. Ämma şartlar yuq häm bulırğa da oşamağan. Bez isä bernärsägä dä qaramastan ciñ sızğanıp eşlibez.

Al'bina Zäynulla

XS
SM
MD
LG