Accessibility links

сишәмбе, 6 декабрь 2016, Казан вакыты 19:06

Microsoft Vista sistemın täqdim itte. Tatar ölgese qayçan äzer bulaçaq?


30 Noyäber Microsoft kompaniäse Vista isemle yaña operatsion sistemın bäyän itte. New Yorkta ütkän çarada şirkätneñ başqarma citäkçese Steve Ballmer xäzerge Windows XP belän çağıştırğanda Vista küpkä iminräk häm ışanıçlıraq bulaçaq, dip wäğdä itte. Ğadi qullanuçlarğa ul 30 Ğinwarda satıla başlıy. Ä Vistanıñ tatar versiäse qayçan äzer bulaçaq?

Vista digän yaña sistemın Microsoft 5 yıl buyı eşläde. Täqdim itü berniçä tapqır kiçekterelde. Steve Ballmer süzlärençä, bu Microsoft tarixında iñ zur proyekt. Office digän yaña program törgäge belän bergä Vista beryaqtan iminräk, ikençe yaqtan, sanaq çeltärenä yaraqlaştıruda qulayraq bulaçaq.

Bu çınlap ta şulaymı, Vistanı satıp alaçaqsızmı, digän soraw belän bez radiobıznıñ İT, yağni mäğlümät texnologiäse citäkçese George Kennedy''ğa möräcäğät ittek:

"Vista küpkä ışanıçlıraq häm iminräk bulaçaq dilär. Zur şirkätlär öçen bu möhim. Härkem röxsäte bulğan dokumentka ğına kerä alaçaq. İkençe yaqtan, idarä itü caylaşa, bu da bezneñ öçen qızıqlı" di İT belgeçe.

Aldağı ike ayda Vista korporatsiälärgä genä satıla. Ğadi qullanuçılarğa ul Ğinwarnıñ 30nda satıla başlıy.

Şuşı waqıt eçendä Microsoftnıñ keremnäre kimer dip kötelä. Täqdim itü könendä anıñ aksiäläre 15 centqa töşte. IT citäkçeläre Vistanı satıp alırğa aşıqmas kebek. Windowsnıñ elekke versiäläre dä şaqtıy xatalı buldı. "Tişeklärne" yamaw öçen Microsoft soñraq "yamawlıqlar" yasarğa mäcbür buldı.

"Tulısınça äzer bulmıy torıp bez anı almayaçaqbız. Yış qına şulay bula: Microsoft närsäder çığara, annarı oçqılıq tota başlıy. Şuña kürä bez 9 ay, ber yıl çaması kötäçäkbez" di radiobıznıñ İT citäkçese.

Mäğlüm bulğança, Tatarstan xökümäte belän Microsoft arasındağı kileşü nigezendä Windows sistemnarınıñ tatar versiäläre eşlänä. XP digäne inde ğämäldä, bu turıda Azatlıq xäbär itkän ide. Xäzer Vistanı äzerläw eşe bara. Eşneñ niçek baruı turında bez eş törkeme äzğası, xäzerge waqıtta Quşma Ştatlarnıñ Boston şähärendä Suffolk universitetında uquçı İldar Ayupovtan soradıq.

İngliz telennän tatarçağa tärcemä itkändä, bigräk tä, texnologiä ölkäsendä, qaywaqıt atamalar-terminnar citep betmi. Bu mäsäläne niçek xäl itäsez digän sorawğa İldar bolay dide:

"Terminologiä mäsäläse iñ zurlardan, sanaq qına tügel, başqa ölkälärdä dä eşkärtelmägän. Qayber atamalarnı uylaptabırğa turı kilä. Misal öçen, "ok" XPda "äye" ide, Vistada "xup" dip täqdim ittek, başta säyer toyılsa da, annarı iäläşäseñ."

Awırlıq tudırğan tağın berniçä atama bar ikän: "Äytik, "mouse" süzenä dä qulay termin tabu qıyın. "Tıçqan" süze bar, läkin anıñ bik ük matur bulmağan başqa mäğnäse bar."

İldar süzlärençä, XP belän çağıştırğanda Vistada yomşağraq, qullanuçığa yaqınraq könküreş tele qullanıla. Tärcemä itkändä, alar monı iskä alırğa tırışa. Tıñlawçılarıbıznıñ täqdim-fikerläre bulsa, ul alarnı şuşı adresqa yullarğa ütende: xat@selet.biz

Vistanıñ tatar versiäse qayçan äzer bula, digän sorawğa, bu soraw Microsoftqa, läkin belüemçä, kiläse yılnıñ Yün-Yül ayalarına äzer bulırğa tieş, dide ul.

Şulay itep, Vistanıñ tatar şäkele 7-8 aydan kötelä. Anıñçı Vistanıñ üzendäge xataları tabılıp tözäteler, tatar versiäse mömkin qädär kamilräk bulır dip ömetlänik.

Ali Ğilmi
XS
SM
MD
LG