Accessibility links

чәршәмбе, 7 декабрь 2016, Казан вакыты 11:51

Qazanlılar üz xoquqların üzläre yaqlıy başladı


Qazanda yäşäwçe Aydar Xismätullin şuşı yılnıñ fevral' ayında seksual' cinayät qıluda ğayıplängän bulğan. Xismätullin qulğa alına, ämma ike ay çaması uzğaç anıñ cinayätkä qatnaşı bulmawı raslanıp, ul irekkä çığarıla. Gäyepsezlege raslanğançığa qädär isä Aydar izolyatorda torırğa mäcbür bula.

İrekkä çığarılğaç, Aydar Qazannıñ xoquq yaqlaw üzägenä möräcäğät itep qarıy. Xoquqçılar aña beleşmä birep cibärä. Bu keçkenä kitapçıq cinayätkä tartılğan, ämma ğayıpsez keşegä üz xoquqların yaqlarğa öyrätä. Alay ğına tügel, ğayıpsezlege raslanğaç, kürgän zıyan öçen däwlättän aqçalata kompensatsiä alırğa da yärdäm itä. Tik Aydar xoquqçılarnıñ kiñäşlären qullanırğa ölgermi qala. Avgust axırında näq şundıy uq cinayättä gäyeplänep, ul yänä qulğa alına. Häm bu yulı da anıñ ğayıpsezlege raslana. Aydarğa ber-ber artlı cinayät eşe quzğatu anıñ tormışına zur zıyan sala. Bilgele, seksual' cinayättä ğayıplängän keşegä qarata tirä-yun'dägelärneñ mönäsäbäte kisken naçaraydı. Ğayıpsez buluına da qaramastan.

Çirattağı tapqır irekkä çıqqaç, Aydar Xismätullin xoquq yaqlaw üzägeneñ beleşmäsen öyränä başlıy. Xoquqçılar kitergän mäğlümatlarnı qullanıp, ul üze kürgän zıyan öçen däwlättän 125 meñ sum aqça da alğan. Şulay itep, Aydar üzen yaqlap, bu eştä ciñüçe bulıp çıqtı.

Mäxkämädä anıñ xoquqların yaqlarğa bulışqan beleşmä isä menä niçek äzerlängän. Xoquqçılar başta aksiä oyıştırğan bulğan. Şuşı xaqta Qazannıñ xoquq yaqlaw üzäge citäkçese İğor Soloxov söyli:

Älege aksiädä mäxkämä tarafınnan aqlanğan yäki cinayät eşläre tuqtatılğan keşelär bezgä ğarizalar tapşırdı. Alar milekkä qarata häm ruxi zıyan alu öçen kompensatsiägä xoquqlı. Şulay uq bu oçraqta prokuror däwlät isemennän älege keşe aldında ğafu ütenergä tieş. Xoquq yaqlaw üzägenä möräcäğät itüçelärgä bez kompensatsiäne alırğa bulıştıq. Näticädä, milekkä qarata häm ruxi zıyan öçen tatarstanlılar Rusiä häm respublika qaznasınnan 1млн yarım sum aqça aldı. Älege aksiä Qazannan tış, Samar, Çabaqsar, Çita şähärlärendä dä uzdı. Häm bu täcribäne tuplap, bez beleşmä dä çığardıq. Beleşmädä ğadi tel belän qatlawlı yuridik mäs'älälär añlatılğan: aqlanuğa kem xaqlı, mäxkämädä üzeñne niçek totarğa, ruxi tormışqa häm milekkä kiterelgän zıyannı niçek raslarğa. Älege kitapnı alğan här keşe, yuridik beleme bulmasa da, möstäkıyl' räweştä üz xoquqların yaqlıy ala.

Qazannıñ xoquq yaqlaw üzäge citäkçese İğor Soloxovnıñ fikerlären işettegez. Menä şulay itep, Qazannıñ xoquq yaqlaw üzäge üz eşçänlegen kiñäytä bara.

Al'bina Zäynulla

XS
SM
MD
LG