Accessibility links

сишәмбе, 6 декабрь 2016, Казан вакыты 05:56

Yazuçılar Berlegenä çittäge millättäşlärebez alındı


Tatarstanda ädäbiät häm sänğät yılı da tämamlanıp kilä. Bıyıl Tatarstan Yazuçılar berlege idäräseneñ eşçänlege dä bik qızudan bardı. Tanılğan şağir İlfaq İbrahimov citäkçelegendäge 100 dän artıq äğzası bulğan TR Yazuçılar berlege bıyıl yözdän artıq äğzasınıñ icatın barlap üttelär. Alar arasında törle yubiley kiçäläre dä, böyek yazuçılarnı iskä alu kiçäläre dä, icat keşeläre belän xuşlaşu märäsimnäre dä, ädäbi muzıkal' kiçälärdä yaña kitaplarnı täqdim itü dä - barısı da buldı.

Ämma TR Yazuçılar berlegeneñ idärä eşçänlege monıñ belän genä çiklänmi. Alar idärä utırışında çit töbäklärdä tatarça icat itkän yazuçı, şağirlär, tänqitçelärne dä TR Yazuçılar Berlegenä äğza itep qabul itü eşlären dä başqaralar.

Küptän tügel genä Tatarstan Yazuçılar berlegeneñ idärä utırışı uzdı.Anda qaralğan bik küp mäs'älälär arasında berlekkä yaña äğzalar qabul itü mäs’äläse dä bar ide. Utırışta çit töbäklärdä yäşäp, tatarça icat itüçelär - Mari-El respublikasınıñ Voljsk şähärennän tänqitçe İl'şat Wäliulla , Mordoviäneñ Saranski şähärennän –Kamil Tangalıyçev , häm Başqortstannıñ Oktäberskiy şähärendä yäşäwçe -Marsel' Garipovlar Tatarstan Yazuçılar berlegenä äğza itep alındı. Bu millättäşlär üzläre yäşägän töbäklärdä tatarça icat itep, tatar milli xäräkäten oyıştırıp, tatar milli möxtäriätenä yärdäm itkän, şäxeslär qabul itelde . Alar icatları häm ictimaği eşçänlege belän xalıqqa xezmät itälär, -dide alar turında Tatarstan Yazuçılar berlege räise urınbasarı Älfät Zakircanov, Azatlıq radiosına . Marsel'Garipovnıñ icatı turında ul bolay dide.

“Marsel' Garipov ädäbiätta ul Mansur Möxämmätşin häm Mirsäy Ğarif täxällüse - psevdonimı belän qatnaşa. Kiñ qatlawlı uquçılarğa ul Mirsäy Ğarif täxällüse belän kübräk tanılğan, dip uylıym. Anıñ soñğı waqıtta dönya kürgän “Mäñgelek mäxäbbät”kitabı olı şağirebez G Tuqaynıñ Zäytünä isemle qızğa bulğan mäxäbbäte turında. Mirsäy Ğarifnı min ädäbiät belgeçe häm Tuqayıbız icatın bik yaxşı belüçe keşe dip atar idem. Çönki xezmättä Tuqay yörgän urınnar häm Zäytünä tutaş yäşägän cirlär turında bay mäğlümat tuplanğan. İkençe yaqtan ul Tuqaynıñ mäxäbbät lirikasına qarağan şiğerlären centekläp öyrängän, alarğa matur ätraflı bäya birä . Häm şuşı şiğerlärenä nigezlänep, näq Tuqaynıñ xatın-qızğa bulğan xis- kiçereşlären, şuşı dönyanı matur itep aça alğan, dip sanıym. Älege kitaptağı ayırım büleklär, özeklär “İdel” jurnalında basılıp çıqqan ide. Häm ul şunıñ belän dä tatar uquçılarına barıp citte. Näq menä şuşı eşçänlege öçen Mirsäy Ğarifnı Tatarstan Yazuçılar berlegenä qabul ittek. Häm anı üzebezneñ qälämdäşebez dip tanıybız. Kiläçäktä dä aña uñışlar telibez.”

Soñğı yıllarda TR Yazuçılar berlegenä qabul itüne ütenep berlekneñ idäräsenä ğarizalar belän Rusiäneñ başqa töbäklärendä yäşäwçe millättäşlärneñ kilüe yañalıq tügel. Ni öçen, alar üzläre yäşägän töbäklärdä yazuçılar berlegenä terkälmilär soñ? Marsel' Garipov bu turıda menä närsä dide.

Qızğanıç ki, , Başqortstanda bezneñ Könbatış rayonnarınnan tatar bülekçäsenä 30 yıl buyına ber keşene dä alğannarı yuq ide. Läkin menä bıltır Äbüzär Zaripovnı aldılar.

Şul uq soñğı 5-6 yılda ğına bezneñ Tuymazı töbägennän Oktäberskiy şähärennän menä xäzer inde öçençe keşe Tatarstan Yazuçılar berlege äğzası buldı. İñ başta Xämit Latıypov, annan soñ Nailä Minnixanova. Häm öçençese min - Marsel' Garipov. Tatarstanda mine bik yaxşı qarşı aldılar. İlhamlanıp qaytıp kitäm, räxmät ”.

Ğomumän, TR Yazuçılar berlege çit töbäklärdä yäşäp icat itkän yazuçı, şağirlärneñ üz saflarına omtılularına uñay qarıylar. Kürşe Udmurtiä belän dä näticäle genä eş alıp baralar. Küptän tügel çığışı belän Tatarstannan bulğan, - İjauda yäşäwçe İbrahim Nafiyqov, uquçılarğa ul İbrahim Biektawlı, bularaq tanış, Tatarstan Yazuçılar berlegenä äğza itep qabul itelgän bulğan. Älfät Zakircanov älege köndä Udmurtiädä yäşäwçe Ğimran Safinnıñ icatı şiğriät ostaxanäsendä tikşerelüe turında äytte. Ğomumän, Udmurtiä Yazuçılar berlege Tatarstannıñ Çallı öleşe belän bäyläneştä tora. Bıyıl Udmurtiädä tatar bülegen açu mäs’äläse dä qarala ikän.

Tatarstan Yazuçılar berlege çittä yäşäp tatarça icat itüçelärneñ icatına ayıruça iğtibar belän qarıy. Yazuçılar berlege Qazandağı Tatarstan kitap näşriätı belän dä berlektä eşläp, çittä yäşägän äğzalarınıñ kitapların bastıru buyınça da, alarnıñ icatın uquçığa citkerü buyınça da şaqtıy eşlär alıp bara.

Mälikä Basıyr

XS
SM
MD
LG