Accessibility links

якшәмбе, 4 декабрь 2016, Казан вакыты 06:55

Litvinenko möselmança kümergä sorağan. Britan tikşerüçeläre Mäskäwdä kirtägä tarıdı


Elekke FSB ofitserı Aleksandr Litvinenkonıñ ülemen tikşerüçe Britan belgeçläre Mäskäwgä kilde häm Litvinenko belän elemtädä bulğan keşelär belän oçraşırğa tırışa. Londonda ağulanudan wafat bulğan Litvinenkonıñ cirlänü waqıtı äle iğlan itelmägän. Yaqınnarı äytüenä qarağanda, ul üzen möselmançä kümergä sorağan.

Elekke FSB ofitserı Aleksandr Litvinenko 24 Noyäbergä qarşı töndä London xastaxanäsendä wafat buldı. Ülemneñ säbäbe dip polonium-210 dip atalğan nurlanışlı matdä äytelde. London politsiäse monı "säyer ülem" dip atadı häm tikşerü eşläre alıp bara. Mäğlümät çaralarında küp törle farazlar äytelä, ämmä Scotland Yard üzenä xas räweştä älegä belderülärdän totılıp tora.

Litvinenkonıñ yaqınnarı äyütençä, üler aldınnan ul İslam dinen qabul itkän häm üzen möselmança kümergä sorağan. Aleksandrnıñ ätise Valter Litvinenko radiobıznıñ urıs bülegenä bolay dide:

"Ülerenä ike kön qala, ul miña, äti, siña citdi süzem bar, min möselman budım dide. Min aña, ulım, bu sineñ qarar, iñ möxime komunist yä şaytan bulma, didem. Min üzem xristian, kiyäwem qabardalı, möselman, onığım bar, bez Allanı yuğaltmadıq, barıbız da ışanabız, ä inde kem niçek ışana – härkemneñ üz eşe" di Valter Litvinenko.

Ätise äyteünçä, Aleksandrnıñ pravoslav çirkäwennän küñele qaytqan bulğan, İslamğa küçü turında ul küptän uylanğan.

Çeçen separatistları wäkile, Londonda sörgendä yäşäwçe Äxmät Zakaev süzlärençä, Aleksandr Litvinenko xäle awır buluğa qaramastan, üz aqılında bulğan. Politsiä wäkilläre belän könenä 16 säğät eşlägän. Soñğı waqıtqa qädär däwalanuğa ömeten özmägän. Ülerenä ber kön qala xastaxanägä imam çaqırırğa ütengän:

"22 Noyäberdä, anıñ ixtiarı häm xäläleneñ rizalığı belän imamnı çaqırdım. Ul Yasin süräsen uqıdı. Möselman ğädätlärenä kürä mäyetne yuarğa kiräk, qızğanıçqa qarşı, bez Aleksandr telägän bar şartlarnı da üti almıybız. Nurlanış säbäple anıñ casäde taş tabutqa salınaçaq, anı 6 yıl yarım açırğa yaramıyaçaq" di Äxmät Zakaev.

Litvinenko ülemen tikşerüçe Britan törkeme düşämbedä Mäskäwgä kilde, Rusiä prokuraturası wäkilläre belän oçraşıp xezmättäşlek itergä kileşte. Rusiä yağı yärdäm wäğädä itte.

Läkin Britan belgeçläre telägän keşelär belän oçraşa alırmı älegä bilgesez. Berençe çiratta alar Litvinenko belän Londonda küreşkän Andrei Lugovoy belän söyläşergä telär ide. Ul häm anıñ ike iptäşe Litvinenko belän Noyäberneñ 1ndä London qunaqxanäsendä oçraşqan. Öçese dä ülemgä qatışı buluın kire qağa. Ämmä Britan belgeçläreneñ alar belän oçraşa aluı ikele. Elekke iminlek xezmätkäre, eşquar Andrei Logovoy ğailäse belän xastaxanägä yatqan dielä.

Britan tikşerüçeläre öçen tağın ber qızıqlı keşe – şulay elekke iminlek xezmätkäre Mixail Trepaşkin bula alır ide. Däwlät serlären taratuda ğäyeplänep ul xäzer törmädä utıra. Advokatları äytüençä, anda Litvinenkonıñ ülemenä qağılışlı mäğlümät bar. Ämmä Rusiä räsmiläre Britan tikşerüçelärenä Trepaşkin belän oçraşırğa röxsät birmägän.

Ali Ğilmi
XS
SM
MD
LG