Accessibility links

чәршәмбе, 7 декабрь 2016, Казан вакыты 23:19

İnvalidlarğa eş täqdim itü yärminkäse ütte


Şuşı könnärdä invalidlar unkönlege bara. Bu uñaydan mömkinlekläre çiklängän keşelär qulı belän eşlängän kürgäzmä açıldı Qazanda. Törle konsertlar, kiçälär ütä. Pänceşämbedä isä invalidlar öçen iñ möhim çaralarnıñ berse buldı. Bu könne alarğa eş täqdim itü yärminkäse ütte. İnvalidlar yärminkäse Qazannıñ Ofitserlar yortında ütte. Xäyer, invalidlar yärminkäse dip atalasa da, monda eş täqdim itü çarası barlıq keşelär öçen dä oyıştırılğan ide. Eşsezlek probleması sälämät keşe öçen dä bik aktual'. Älbättä, awırular öçen eş tabuı tağın da qatlawlıraq. Yärminkägä eş urınnarı ezläp 400läp yaqın keşe kilgän ide. Qazannıñ törle oyışmaları alarğa 10 meñgä yaqın eş urını täqdim itte. Bu sälämät keşelär öçen. Bilgele, mömkinlekläre çiklängän keşelärgä saylaw mömkinlege küpkä azraq ide.

Qazanda yäşäwçe Liliä Räşitova dä şuşı yärminkägä eş ezläp kilgän. 44 yäşendä genä bulsa da, mömkinlekläre çikle bulğaç, Liliä eşkä urnaşa almıy:

Min 2,500 sum pensiä alam. Älbättä, bu miña yäşärgä citmi. Minem tağın qızım da bar. Darularğa küp aqça betä. Eş ezlärgä dip kildem monda. İke eş taptım. Belmim, alırlar mikän, yuq mikän. Min bit awır äyber kütärä almıym. Kön buyı da eşlärgä mömkinlegem yuq. Bezne bit eşkä almıylar. İnde mäşgul'lek üzägendä ällä niçä tapqır buldım. Anda minem öçen ber närsä dä yuq. Üzemä ezlärgä qala inde.

Yärminkädä şaqtıy küp eş urını täqdim itelde. Bu yuqqa ğına tügelder. Alarnıñ xezmät xaqları bik tübän ide. Andıy eşkä barırğa teläwçelär az. Uqıtuçılar, şäfqät tutaşları, balalar baqçaları tärbiäçelärenä täqdim itelgän xezmät xaqı 2-3 meñnän artmıy. Bala qarawçığa da, uram seberüçegä dä xezmät öçen 1,500 sum tülänä. Xäyer, mömkinçelege çiklängän keşegä bu xäyerçe xezmät xaqı da eläkmi. Çönki alarnı eşkä aluçılar bik az.

Al'bina Zäynulla

XS
SM
MD
LG