Aprel' ayınnan başlap bügenge köngä qädär festival' Nurlatta, Riğada, İjauda, Çabaqsarda, Ul'yanda, Berlinda tatarlar yäşägän küp kenä töbäklärdä ütkärelde. Xäzer inde menä Wahapov festivaleneñ yomğaqlaw konsertı Qazanda ütäçäk. Şuşı konsertta qatnaşırğa dip pänceşämbe könne Qazanğa iseme böten dönyağa mäğlüm qazax cırçısı Bibigöl Tülägänova kilde. Şul uñaydan İdel-Press näşriät yortında cırçı qatnaşında matbuğat oçraşuı uzdı. Dön'yaküläm tanılğan cırçı, opera sänğäteneñ mäşhür yoldızı Bibigöl Tülägänova pänceşämbe könne Qazanğa berençe tapqır kilde. Moñarçı isä cırçını küp kenä illärdä soqlanıp qabul ittelär. Ul gastrol'lär belän dönyanıñ 40 tan artıq ilen yörep çıqqan. Alar arasında Amerika Quşma Ştatları, Kanada, Böyekbritaniä, Fransiä, Germaniä, Gretsiä, Yaponiä, Qıtay, Misır , Tön'yak häm Kön'yak Qoreya häm başqa bik küp illär bar.
Matbuğat oçraşuında cırçı ata-babalarınıñ tuğan yağına zur dulqınlanu belän kilüen äytte.
“Min üzemne ütä bäxetle dip sanıym şuşında kilüem belän. Bu festival'gä çaqıru öçen min bik zur räxmätlemen. Monda min berençe tapqır kildem. Belmim nigäder Qazanda moñarçı ber dä kilgänem yuq ide. Küptän tügel genä minem säxnägä eşläp yörüemä 55 yıl buldı, bu waqıt eçendä min bik küp cirlärdä buldım, ämma menä Tatarstan belän Başqortstanğa hiç barıp çıqqanım yuq ide. Allağa şöker soñ bulsa da min Qazanğa kildem. Möğayın mine ata-babamnıñ tuğan cire tartıp alıp kilgän bulsa kiräk. Minem äniem tatar, şunlıqtan bezdä inde tatar qanı ütä küp. Qaywaqıt min maqtanam da üzem tatar buluım belän. Mäktäptä uqıp yörgändä min üzemne Bibigöl tügel, ä Galya, tatarka dip yörtä idem. Annarı inde atañ qazax dip mine qazax dip yörtä başladılar. Läkin min berqayçan da ike xalıqnı ayırmadım. Ägär dä tatarğa tel tidersälär, min tatr yaqlı, qazaxqa tel tidersälär alar yaqlı bulam. Menä şul ike xalıq arasında min qaynap yäşim.”
Şulay uq, Bibigöl Tülägänova Wahapov festivaleneñ oyıştıru komitetı eşen yuğarı bäyäläp, bu ruxtağı festival'lärne kütärergä kiräk dip belderde.
“Bu festival' digän dönya ütä kiräk äyber. Ayıruça bezneñ yäşlärgä kiräk. Şundıy ölkän cırçılarnı işetep, kürep alar üsä. Ägär dä bez ölkän buınnı tanıtmasaq, bezneñ arttan kilüçe yäşlärgä ütä qıyın bulaçaq. Xäzer menä estrada digännäre bezneñ ükçäbezgä basıp kilä. Häm professional' cırçılarğa bik awır. Bu festival'gä mine çaqırğaç min bik quandım. Çönki Räşit abıynı minem berniçä tapqır kürgänep dä bar ide. Äle min student çaqta ul Alma-Atağa kilep çığış yasağan ide. Häm isemdä anıñ cırlawı iskä qalğan. Äytik, Yäxinnıñ “Sandığaç”, häm tatar xalıq cırı “Märfügä”. Şunlıqtan min uylıym bu keşe yuq bulsa da, anıñ iseme cir yara. Ul tatar xalqınıñ maqtanışı häm yäşlär şunı kütärep alıp alğa alıp barırğa tieş. ”
Ğäcäyep kömeş tawışlı koloratur sopranoğa iä mäşhür qazax cırçısı Wahapov festivalendä üzeneñ ataqlı “Bılbıl” cırın, şulay uq tatar xalıq cırların başqarır dip kötelä. Oçraşuda Bibigöl xanım ozaq kıystatmıyça cırlap ta kürsätte. Ä tamaşaçılarğa Bibigöl Tülägänova üz icatın Räşit Wahapov isemendäge festival'neñ yomğaqlaw konsertında täqdim itäçäk.
Gölnaz Şäyxetdin
