Accessibility links

пәнҗешәмбе, 8 декабрь 2016, Казан вакыты 12:51

Yekaterinburda “Ural sanduğaçı” töbäkara cır bäygese uzdı


Bu könnärdä Yekaterinburg şähärendä “Ural sanduğaçı” dip atalğan töbäqara tatar cırı festivale bulıp uzdı. Festival'ne Yekaterinburg şähärendä eşläp kilüçe Milli media-xolding, Bötendönya tatar kongressı başqarma komitetı, “Salawat” estrada teatrı ğamälgä quydılar.

Milli media-xolding citäkçeläre başlanğıçı belän mondıy festival' inde ikençe märtäbä oyıştırıla. Ul Ural töbägeneñ tanılğan cırçısı Rezeda Yärullinanıñ yaqtı istälegenä bağışlanıp dönyağa kilgän ide. 2004 nçe yılda uzdırılğan berençe festival' Sverdlovski ölkäse külämendä uzdırılıp, “Rezeda” iseme belän ataldı. Ul waqıtta oyıştıruçılar festival'ne här ike yıl sayın uzdırıp torırğa süz quyışqannar ide. Häm menä ike yıldan soñ, festival'neñ statusı üste häm ul üz qanatı astına Perm, Çiläbe, Kurgan, Tömän, Sverdlovski ölkälärennän kilgän Ural sanduğaçların cıydı.

Konkurs programmasında 16 yäştän 35 yäşkä qädär bulğan barısı illedän artıq yäş talantlar qatnaştı. Bäygedä qatnaşuçılarnıñ çığışın zur däräcäle wäqälätle jyuri bilgeläde. Jyuri äğzaları bulıp tatar estradasınıñ asıl zatları – Salawat Fätxetdinov, Firzär Mortazin, Al'fred Yakşimbetov, Röstäm Zakirov, Al'bina Kinjalieva häm şulay uq Ural yoldızları Xäydär Gıyl'fanov, Marat Qanafin, Ğayfulla Abzalov eşlädelär.

Bez här ike festival'dä dä jyuri räise bulıp eşlägän Salawat Fätxetdinov belän äñgämä qorıp aldıq. İnde ikençe märtäbä Ural töbägenä festival'dä eşlärgä kilüen ul biredä tatar tormışına bitaraf bulmağan yaqın dusları buluı belän añlattı. “Millätne millät itep, üz-üzegezne xörmät itep yäşisez, bu bik zur äyber. Bez tatarlar tatarlarğa ğına kiräk. Ber-berebezgä şulay bulışıp, yärdämläşep yäşik. Bu bezneñ duslığıbıznıñ urtaq cimeşe”, - dide ul.

“Ural sanduğaçı” töbäqara tatar cırı festivalendä Gran-pri ğa Sredneural'ski şähärennän Ruslan Vakkasov layıq buldı. “Tatar cırın iñ yaxşı başqaruçı” nominatsiäsendä berençe urınnı Perm ölkäseneñ Oktäberskiy bistäsennän kilgän Gölnaz Zinnätova aldı. İñ yaxşı vokal' ansambl' bulıp Pervoural'ski şähärennän “Ural moñnarı” ansamble tanıldı.

Konkurs näticäläre buyınça şulay uq här ike nominatsiädän ikençe, öçençe urınnı alğan lawreatlar, jyuri tarafınnan bilgelängän maxsus prizlarğa layıq biş konkursant häm tağın biş diplomant bilgelände.

Ural töbäge cırçılarınnan alğan tä'sirleren jyuri äğzası, tanılğan kompozitor, Tatarstannıñ atqazanğan artistı Firzär Mortazin bolay dip söyläde:

- “Tatar bar ikän äle dip söyenep utırdıq. 16-17 yäşlek qızlar, yegetlär çığıp mönäcät tä äytälär, xalıq cırların da akapella başqaralar. Urıs arasında yäşäp, andıy cırçılar buluı bik quanıç. Oyıştıruçılarğa räxmät. Min bik ğorurlanam monda kilgänemä”, - dide ul.

Kiç belän meñnän artıq keşe sıyışlı zalnı şığrım tutırıp cıyılğan tamaşaçı iğtibarına festival'dä ciñüçelär häm jyuri äğzaları tarafınnan zur Ğala-konsert täqdim itelde. Buınnar almaşın çağıldırğan, mul bizäkle, tatar estrada yoldızları balqışı belän bayıtılğan Ğala-konsert xalıq öçen çın mäğnäsendä tatar cırı bäyrämenä äwerelde.

Fäwiä Safiullina, Yekaterinburg

XS
SM
MD
LG