Accessibility links

шимбә, 10 декабрь 2016, Казан вакыты 10:12

Mäskäw xastaxanäsendä yanğınnan 45 xatın-qız ülde


Mäskäwdä narkomaniä häm eçkeçelektän däwalanuçılar xastaxanäsendä yanğınnan kimendä 45 xatın-qız hälak buldı. Un keşe cäräxätlängän, yözdän artıq keşene evakuatsiälägännär. Xastaxanägä ut törkännär digän şik belän tikşerü eşläre bara.

Yanğın turında xäbär tönge ikelär tiräsendä bulğan. Yanğın süderüçelär 10 minut ta ütmästän kilep citep utnı 20 minut eçendä sündergän.

Rusiä ğädättän tış xällär ministlığınıñ yanğınnar bülege başlığı Yuriy Nenaşev xastaxanägä maxsus räweştä ut törtkännär dip 90 protsentqa ışanam dide.

"İnde xäzer ük ut aşxanädä başlanğan dip ışanıç belän äytep bula. Utnıñ başlanğanın urını tabıldı. Utnı maxsust törkännär digän 90 protsent ışanıç bar" dide Nenaşev.

Şulay da Mäskäw şähär prokurorı Yuriy Syomin äytüençä, törle mömkinleklär tikşerelä.

"Ut çığunıñ törle säbäpläre, şul isäptän maxsus ut törtelgän bulu mömkinlege dä tikşereläçäk. Keşelär maxsus ut törtkän bulırğa da mömkin" dide Syomin.

Qorbannarnıñ kübese tötennän buılıp ülgän dielä. Nenaşev däwalanuçılarğa bikle işeklär häm räşätkälär uttan qaçu mömkinlege birmägän di.

"Keşelärneñ ülüenä töp säbäp evakuatsiä yulınıñ berse räşätkälär belän biklängän buluı. İkençe yulnı quyı töten qaplağan bulğan. Şuña kürä keşelär qaça almağannar häm ülgännär. 4 xezmätkär yanğın waqıtında xastaxanädä bulğan, ämma alar däwalanuçılarğa yardäm itä almağan, alar üzläre çığıp kitärgä mäcbür bulğan" dide Nenaşev.

Ğädättän tış xällär ministrlığı iminlek taläpläre ütälmäw säbäple yıl başında bu xastaxanäne yabarğa telägän bulğan. Säbäbe täräzälärdäge häm çığu yullarındağı räşätkälär ide dielä. Ämma mäxkamä ministrlıqnıñ bu möräcäğäten kire qaqqan.

Soñğı yıllarda Rusiäneñ narkomaniä, eçüçelektän däwalanuçılar, yäki ruxi awırular xastaxanälärendä qorbannarğa kitergän berniçä yanğın buldı. Uzğan dikäber ayında şundıy Mäskäw yanındağı psixik awırular xastaxanäsendä çıqqan yanğında 7 keşe, 2005-neñ martında Samar yanında narkomaniädän däwalaw üzägendä yanğında 7 keşe ülgän ide.

Naif Aqmal, Praga.
XS
SM
MD
LG