Accessibility links

сишәмбе, 6 декабрь 2016, Казан вакыты 17:17

AQŞnıñ Discovery ğäläm korabı Xalıqara Ğäläm Stansiäsenä kitte


Ul Floridadağı Kennedy Ğäläm üzägennän tönlä yul aldı. Discoverynı oçıru hawa şartlarınıñ naçar buluı säbäple inde ber märtäbä kiçekterelde. Köçle cil säbäple oçış uzğan töndä yañadan kiçekterelergä mömkin ide. Ämma cil tındı häm oçışlar idaräse ğälämgä kitü öçen Discoveryğa utırırğa kilgän astronawtlarnı iğlan itte.

"Menä kilälär, bezneñ astronawtlar. Mark Polansky citäkçelegendä William Oefelein, Nicolas Patrick, Robert Curbeam, Christer Fuglesang, Joan Higginpotham" dielde.

Soñğı sekundlar sanalğannan soñ ğäläm korabı quzğalıp kitte.

Korabtağı törkem berençe säğätlärdä törleçä korabnıñ tieşençä eşläwen tikşerde. 2003 yılda Columbia korabı cirgä qaytqanda qazağa yulıqqannan soñ AQŞ ğäläm agentlığı NASA barlıq tönge oçışlarnı tıyğan ide. Korabnıñ cılılıq qalqanına Cirdän kitkändä zıyan kilü säbäple kire qaytqanda ul kisäklärgä tarqaldı. Ul çaqta Columbiadağı 7 astronawtnıñ barısı da hälak buldı. Şunnan soñ tönge oçışlar tıyıldı. NASA korablarnı köndez oçırğanda kameralarğa korabtan ayırılğan kisäklärne kürü ciñelräk bulır dide.

Korabnı häm küzätü sistemaların kamilläştergännän soñ xäzer NASA tönge oçışlar da imin bula ala dip isäpli.

NASA wäkile Leroy Cain xäbärçelärgä xäzergä Discoveryda hämmä närsä tieşençä eşli dide.

"Min sezneñ alğa çığar aldınnan oçışlar idaräsendäge xezmättäşlärem belän söyläştem. Bernindi problema da yuq, bernindi citeşsezlek turında da xäbär yuq" dide Cain.

NASA oçış mödire Mike Leinbach ta oçıştan bik qänäğät.

"Hämmä närsä tieşençä buldı. söyläp torırlıq närsä dä yuq. Şul qädär çista buldı" dide Leinbach.

Korab cir orbitasına kerü belän andağı törkem citäkçese Polansky cirdäge idarä üzägenä monda küplär yılmaya dide.

Discovery häm andağı törkem ğälämdä 12 kön bulaçaq. Düşämbe könne korab xalıqara ğäläm stansiäsenä quşılır dip kötelä.

Törkem äğzaları ğäläm stansiäsenä yaña laborotoriä cihazları urnaştıru öçen anda yaña elektr çıbıqları suzaçaq.

Naif Aqmal, Praga.
XS
SM
MD
LG