Dekaber Rossiä tarixına Çeçnya respublikasında terrorçılarnı yuq itü maqsatı belän xärbi xäräkät başlanuı belän kerep qaldı. Älege datanı iskä alıp, redaksiägä Udmurtiä tatar ictimaği üzägeneñ Maqtawlı Prezidentı Mäsgut Waxit ulı Garatuev şaltırattı. Ul yıllarda tatar üzäge tarafınnan başqarılğan eşlär turında anıñ berençe prezidentı Mäsgut Garatuev bolay iskä aldı.
«Çeçnyada tuğan wäzğıätne qoral belän tügel, säyäsi yul belän xäl itärgä kiräk digän telegrammanı ul waqıtta Rossiä belän idärä itkän Yel''sin isemenä yullıy.Şundıy eçtälekle xatlar, telegrammalar millionlap yullansa, suğış başlanmağan bulır ide, dip ışana Mäsgut Garatuev.
Mäsgut Garatuev şulay uq bu mäs''älä buyınça ul könnärdä Udmurtiä belän idärä itkän Yuğarı Sovet başlığı Tubıylovqa da xat belän kerüen iskä aldı. Tatar ictimaği üzägeneñ maqtawlı Prezidentı härdaim Çeçnyada barğan xällär belän qızıqsınıp toruın, Rossiä citäkçeläre, ul yıllarda ilneñ başlığı Yel''sinğa da Çeçnyada barğan xärbi operatsiälärne tuqtatu buyınça telegrammalar, xatlar cibärüen dä iskä aldı.
Çeçnyadağı xärbi bäreleşlärdä Udmurtiädän dä armiä sostavında, eçke eşlär ministrlığı xezmätendä bulğan yözlägän yegetlär qatnaştı, respublikağa distälägän tabutlar qaytarıldı, küpme analar ulların yuğalttı.
Bügen dä Udmurtiädän Çeçnyağa anda tärtip saqlaw häm cimerelgän respublikanıñ iqtisatın cayğa salu maqsatı belän yartı yıl sayın maxsus otryad cibärelä. Redaksiä arxivında şundıy xezmätkä kitüçelär belän yazılğan tasma saqlanğan.
Kirpiçnikov dip tanıştırdı uzen eçke eşlär ministrlıysında eşläwçe. Berençe suğış waqıtında Kizlyarda bulğan. «1995—96 yıllarda Kizlärdä buldım, Dagestan çigendä. Berençe suğış waqıtında. Bezne komandirolvkağa cibärälär ide.»
Qayberäwlär Çeçnyağa bişär tapqır barğan. Alar anda ni eçen baralar. Cawaplar törle.
İptäşläremne alıştırırğa uz telägem belän baram. Min kemneñder färmanı nigezendä tügel, üz teläge belän kitäm dip belderde ofitser.
Kübese anda tülängän aqçağa ömetlänep bara. Ul aqça ğailäneñ yäşäw şartların üzgärter dip ışana — kübese fatir satıp alırğa niätli. Döres, Çeçnyadan iren kötkän Yılena annan qaytqan aqça fatir alu öçen xätta berençe vznos tülärgä dä citmi dip zarlandı.
Şulay itep, unike yıl elek xärbi bäreleşlärdä cimerelgän şähärlärne torğızu, respublikanıñ iqtisadıy xälen üzgärtü, häm tärtip saqlaw niäte belän bügen dä Udmurtiädän ofitserlar yartı yıl sayın Çeçnyağa kitä. Alarnıñ berençe niäte — ğailäneñ matdi xälen yaxşırtu.
Xämidä Ğayfullina, İjaw
