Accessibility links

якшәмбе, 4 декабрь 2016, Казан вакыты 13:21

İstanbulda Yevropadan Aziägä: Yevropa Berlege turında fikerlär


İstanbulda kön sayın meñlägän keşe Aziädän Yevropağa Yevropadan Aziägä yöri. İñ qısqa yul – ike yarnı totaştırğan 8 minutlıq köymä. Köymälärneñ berse Yevropa yağınnan Aziädäge Üsküdar bistäsenä yul tota, andağı yulçılar ilneñ kiläçägen Yevropada küräme ällä Aziädäme?

Eşkä barğan Tansu isemle yulçı:

"Döresen genä äytkändä, min Törkiäneñ Yevropa Berlegenä kerüen telämim. Çönki şartlar artıq qırıs. Berlekkä kergänçe bez başqa törki millätlär belän Törki berlek yäki İslam berlege tözergä tieş. Bu Törkiä öçen yaxşıraq bulır ide."

İstanbulnıñ Fenerbahçe futbol taqımı canatarı Yener:

"Yevropa Berlegenä kerä dä almıybız, kerergä dä telämibez, yäşäsen Fenerbahçe!"

Universitet talibäse Gökçän isä bu ike yeget belän çağıştırğanda mäsälägä ömetleräk qarıy, sabırlıq häm tırışlıq belän Törkiä äğzalıqqa taba bara ala, di yäş qız:

"Älbättä, Yevropa Berlegenä kerü Törkiä öçen bik yaxşı bulaçaq. İnşalla alğa kiteş bulır dip ömetlänäm. Waqıt kiräk. 60%, alğa kiteş bulsa – 80%, xäzer isä kerügä 60% biräm."

İstanbul uramnarında atlağan sayın ğäcäplänü xise arta ğına... Ber yaqtan bay mädäni häm tarixi miras, Yevropa belän Aziä arasındağı tarixi bäyläneşlär, Ğosmanlı çorınıñ Soltan Äxmät mäçete belän yänäşä – islam, soñıraq xristian ğibädätxanäse bulğan Aya Sofia muzeyı.... İkençe yaqtan – qaynap torğan säwdä üzäge, Kapalı Çarşı digän borıñğı bazar üze genä ni tora. Kön sayın anda turistlar quldan eşlängän kelämnär, Anadolu bizänü äyberläre häm başqa canıñ telägän äyberlär öçen alış-bireşkä kilä.

Zur Bazarda keläm satuçı:

"Bäyälär 100 dollardan başlana. Xäzer kibetebezdä iñ qıybatlı keläm – 120 meñlek (dollar), yefäk, bik matur häm sıyfatlı. İstanbuldan ber 160 çaqrım yıraqlıqtağı Heraklia şähärendä eşlängän."

İngliz telen bu yaqlarda böten keşe belä, bigräk tä yäşlär häm säwdägärlär, ä menä möxit barıber äle könbatış möxite tügel. Biredä möselman dönyası, Yevropalılar näq şul dönyadan yırağraq torırğa teli.

Bu atnada Brüsseldä Berlekneñ tışqı eşlär ministrları Törkiä belän söyläşülärne däwam itergäme yuqmı digän mäsäläne tikşerä. Eş şunda, Törkiä Qıprıs belän säwdä itergä häm anı tanırğa telämi. Törkiä citäkçelege isä annan ğına Yevropanıñ ber öleşe bulu teläge sünmiäçäk, dip belderä.

Alsu Qormaş
XS
SM
MD
LG