Accessibility links

җомга, 9 декабрь 2016, Казан вакыты 16:48

Novaya Gazeta "Çiklärne Tanımawçı Xäbärçelär" bülägen aldı


Rusiädä çığuçı mäğlüm basma Novaya Gazeta "Çiklärne tanımawçı xäbärçelär" oyışmasınıñ "mäğlümat çarası 2006" bülägenä layıq dip tabıldı. Rusiä cämğiätendäge iñ qatlawlı problemalarnı yaqtırtqan bu basma xäbärçelärenä soñğı waqıtlarda yanawlar da bulğan.

"Üzenä qarata yanawlar bulğanda jurnalist qıla alğan iñ yaxşı ğämäl ul – bu turıda cämäğätçelekkä xäbär itü," dide Novaya Gazeta baş möxarrire urınbasarı Sergey Sokolov. 24 noyaber könne basmanıñ ike xäbärçesenä – elektron poçta häm telefonğa sms aşa yanawlar bulğan. Üzläre yazuınça, alarnıñ berse – gazetanıñ Tönyaq Kavkazdağı wazğiätne yaqtırtuı, ikençese – Anna Politkovskaya ülemen tikşerü turında bulğan. Mäğlüm ki, Novaya Gazeta jurnalist xanımnıñ ülemen üze ayırım tikşerä.

Qıyu fikerläre häm jurnalistik tikşerenü näticäläre öçen gazetanıñ inde 3 xäbärçese başların saldı. İñ soñğısı – basmada 1999nçı yıldan birle eşlägän Anna Politkovskaya, aña 14 üktäber könne üz öyendä höcüm itelde. 2003nçe yılda möxarrir Yuri Şçekoçixin, 2000nçe yılda jurnalist İgor Domnikov häläk buldı.

Rusiädä matbuğat irege ölkäsendä Novaya Gazetanıñ eşçänlegen bıyıl "Çiklärne Tanımawçı Xäbärçelär" oyışması da tanıp üz bülägen birde. Oyışmanıñ Yevropa häm elekke Sovetlar Berlege illäre belän eş itkän wäkile Elsa Vidal bügen Azatlıq radiosına bu xaqta menä närsälär belderde:

"Bez bu büläkne Novaya Gazetağa – matbuğat irege ölkäsendäge eşçänlege häm xäbärçeläreneñ jurnalizm eşendä cannarın salğanı öçen birdek."

Matbuğat irege sağında toruçılar Rusiädä yaqın kiläçäktä wazğiät üzgärmiäçäk, xattä naçarlanaçaq, dip farazlıy:

"Saylawlar yaqınlaşqan sayın basım tağın da artır dip kötelä. Bez wazğiätne küzätep barabız, ämma qızğanıçqa qarşı üzgäreşlär naçar yaqqa bulır, dip farazlana."

Baş fatirı Parijda urnaşqan "Çiklärne Tanımawçı Xäbärçelär" oyışması dönya buylap süz irege häm jurnalistlar xoquqların yaqlawçı oyışma. Anıñ Yevropanıñ 8 ilendä häm Kanadada üz bülekçäläre bar. Şulay uq Bangkok, London, New York, Tokyo häm Waşingtonda oyışmanıñ wäkilçelekläre eşli.

Alsu Qormaş
XS
SM
MD
LG