Accessibility links

җомга, 9 декабрь 2016, Казан вакыты 14:48

Ufada İdel buyı başlıqları kiñäşte


12 nçe dekaber Ufada İdel buyı federal' okrugı töbäkläre başlıqları kiñäşmäse uzdı. Anda okrugqa kergän 15 töbäk citäkçeläre qatnaştı. Kiñäşmädä yäşlär säyäsäte, aviatsiä sänäğäte häm ilküläm proyektlar ütäleşe tikşerelde.

Çara Rusiä Konstitutsiä könenä turı kilü säbäple, büläkläwlär belän başlandı. Okrug başı qulınnan büläk aluçılar arasında Başqortstannan da ike keşe bar.

2007 nçe yıl İdel buyı okrugında Yäşlär yılı itep iğlan itelä. Şuña töp süz yäşlär säyäsäte turında bardı. Başqortstan Prezidentı Mortaza Räximov çığışında zamanında Rusiädä däwlät yäşlär eşe belän şöğellänergä tieş tügel digän fiker alğa sörelsä dä, bezdä yäşlär säyäsäte buyınça qanun buldırıldı. Yäşlär belän eşläw däwlät idäräse tözelde, anıñ här şähär häm rayonda bülekläre bar dide. Räximov yäşlär öçen toraq programmaları belän dä tanıştırdı häm ilneñ totrıqlandıru fondınnan yäşlärgä toraq tözügä 100 milliard sum aqça küçerergä kiräk digän täqdim belderde.

Mortaza Räximov demografiägä qağılışlı sannar dä äytep, Başqortstanda küp balalı ğailälärgä taşlamalar häm tüläwlär buldırıluı turında söyläde. Ul SSSR zamanındağı kebek Geroy-Ana isemen buldırunı kütärde. Ul kütärgän tağı ber başlanğıç — töbäklärdä balalar häm yäşlär xoquqların yaqlaw wäkilläre kertü täqdime.

Okrug başı Aleksandr Konovalov sezneñ täqdimnär uñayınnan andıy analarğa berençe häm ikençe däräcäle “Watan aldındağı uñışları öçen” bilgese tapşırılaçağın belderde. Ul şulay uq Rusiädä yäşlär säyäsäte buyınça qanun kiräklegen äytte.

Mordoviä respublikası başı intim xezmätlärne reklamalawnı tuqtatıp ğailä qimmätlären üsterüne yaqtırtuğa kübräk iğtibar bülärgä, Tübän Novgorod däwlät universitetı rektorı liderlar tärbiäläw programması buldıru kiräklegen kütärde. Ä Udmurt respublikası başı Aleksandr Volkov öçen iñ aktual' häm kiçekmästän xäl itäse mäsälä — “Mäktäp söte” isemle programma qabul itü zarurlığı. Bu täqdimgä qarşı Tatarstan Prezidentı Mintimer Şäymiev mäktäplärdä könenä ber stakan söt birüne il programmalarına kertmi dä xäl itep bula dip andıy täcribäneñ Tatarstanda buluın äytte.

Aviatsiä sänäğäte xaqındağı söyläşüdä dä iñ sallı täqdimnär Mintimer Şäymievnıqı buldı. Ul aviatsiä sänäğäten ilküläm proyekt itärgä kiräk dide. Monıñ belän bez çit illärgä bäyle buluıbıznı tuqtatıp, eçke bazarnı nığıtabız ğına dide.

Kiñäşmä qısasında millätara häm konfessiäara mäsälälär xaqında söyläşü buldı. Anı uzdırğan İdel buyı okruğı başı urınbasarı Vladimir Zorin Rusiädä ksenofobiä oçraqları, skinxedlarğa bäyle küñelsez xällär bulıp toruın atap, Başqortstanda bu yaqlap xällär äybät dip belderde.

Kiñäşmädä Konovalov Başqortstan häm federal' üzäk arasında ike yaqlı kileşü tözergä cirlek yuq dide. Mintimer Şäymievqa ni öçen ul xoquq sezgä häm Çeçen respublikasına ğına birelgän digän sorawğa ul 1992нче yılda bu ike respublikanıñ “Rusiäne oyıştıru” dokumentına qul quymawların äytep, bar da mantıykqa turı kilä dide.

XS
SM
MD
LG