Accessibility links

шимбә, 3 декабрь 2016, Казан вакыты 18:35

İjaw möselman ziratında tärtip urnaşa başladı


Udmurtiä respublikasınıñ başqalası İjawda 60 meñnän artıq tatar xalqı yäşi. Alarnın härqaysınıñ yort-cirlere çista, matur, yıraqtan yılmayıp tora dip äytergä bula. Ä menä möselmannarnıñ mäñgelek yortı – ziratıbız turında mondıy süzlär äytep bulmıy. Bu xäl tatar cämäğätçelegen bik borçıp kilde. «Azatlıq» radiosın daimi tıñlawçılar xäterlider, bu xaqta xäbärlärebezdä dä söylägän idek. Ziratnıñ timer qomayları cimerelgän, alar qayırılıp, talanğan, qäberleklär dä taşlandıq xäldä ide. İjaw şäһäre mäçete, Aqsaqallar şurası räise Şihabetdin Sadıyqov bu qızğanıç xällärgä çik quyarğa kiräk dip, xästären kürä başladı. Ütkän yılnıñ dekaber ayında Şihabetdin Sadıyqov İjaw şähäre merı Balakin isemenä xat yullıy. Anıñ berençe xatına xäbär kilmi. Şihabetdin ağa yaz aylarında tağın ikençe xat belän şähär administratsiäsenä bara. Cäy azağında ğına aña möselman ziratı tiräsen qoyma belän totıp alu öçen 600 meñ sum aqça bülenep birelüe xaqında cawap xatı kilä. Aqsaqallar mäçet ähelläre belän oçraşıp, qoymanı timerdän tügel betonnan yasatunı sorap şähär administratsiäseneñ kommunal' bülegenä baralar. Bu oçraqta ölkännär fikere belän kileşep, eş başlarğa kileşü tözilär. Şihabetdin ağa Sadıyqov 12 dekaber könne jurnalistlar belän oçraşuda 2006 yılğa bilgelängän eşlärneñ tögällänüe xaqında citkerde.

Şulay itep, zirat tiräseneñ ber yağı çeltärlänep eşlängän beton qoyma belän totıldı. Tuğızınçı distäne tutırıp kilüçe Şihabetdin Sadıyqov, isän bulsam, bu eşne kiläse yılda tögällärgä, häm äle qoymanı matur töskä buyatırğa da isäbe. Xäzer inde anıñ teläge - qäberleklärne tärtipkä kiterü, häm zirat başındağı çüplektän arınu.

Ziratta, anıñ tirä yağında tärtip buldıru buyınça räsmi orğannar, milli oyışmalarnıñ eşe belen genä çiklänü döres bulmas, di aqsaqal. Yaqınnarıbıznıñ mäñgelek yortında soqlanırlıq çistalıq buldıru öçen barıbızğa da tırışırğa kirәk, dip tämamladı süzen Şihabetdin Sadıyqov.

Xämidä Ğayfullina, Udmurtiä

XS
SM
MD
LG