Accessibility links

җомга, 9 декабрь 2016, Казан вакыты 18:37

Çallıda abortqa qarşı kürgäzmä


Älege kürgäzmä "Feniks" dip atalğan cämğiät başlanğıçı belän oyıştırıla. Cämğiätneñ aktiv ägzaläre Larisa häm Andrey Orlov yäş bulularına qaramastan, 4nçe balaların alıp qaytırğa cıyınalar. Alar, aqça qıyınlıqları abort yasawğa säbäp bula almıy digän fikerdä toralar häm menä abortqa qarşı kürgäzmä oyıştırıp, demografik krizis belän köräşergä uylıylar. Alar äytüençä, könbatış illärendä bala posobieläre zur bulsa da, töp xalıq kimügä bara. Alar uylawınça, demografik problemanı xäl itüdä prezident Putin säyäsäte näticäse bulsa da, axırğaça tügel. Keşelärneñ añın, fiker yörtülären üzgärtergä kiräk, dilär alar. Kürgäzmä äsbaplarına küz salıyq. Biredä qızlarnıñ saflığına, ana keşe böyeklege xaqında videofil''mnar kürsätelä, leksiälär uqilar, yazma materiallar täqdim itälär. Qızıqlı ğına dokumentlar da bar. Şundıylarnıñ berse- Adol''f Gitler boyırığınıñ küçermäse. Eçtälege mondıy- suğış waqıtında alman yegetläre başta öylänergä, bala buldırırğa, annan soñ ğına frontqa cibärelergä tieş bulalar.

Kürgäzmädä şaqtıy qurqınıç närsälär dä bar. Mäsälän, qan tösenä buyalğan, tabiplar abort yasağanda qullana torğan, kiskeçlär, özgeçlär, qısqıçlar cıyılması. Kürgäzmägä kilüçelärneñ küpçelege 9-11 nçe sıynıflarda uquçılar, uçilişçe, yuğarı uqu yortları studentları buluın isäpkä alsaq, ğibrät alırlıq qorallar. Abort instrumentlarına kartinalar galereyasınıñ ölkän fänni xezmätkäre Älfiä Garipova belän säyäxät yasıybız:

"Abort instrumentları quyılğan bülmägä kerü qız balalarğa mäcbüri tügel. Läkin küpläre teläp kerälär, kiräkle mäğlümatlarnı alalar. Qayberläre bik aptıraşçığa, çönki kübese älege instrumentlarnı berençe tapqır ğına kürä. Ä mäktäptä süz belän alğan mäğlümat citärlek tügel. Şuşında uq ana qarınındağı törle srokta abort yasaluçı bala yaralğısı mulyajları da bar."

Ölkän fänni xezmätkär Älfiä Garipova äytüençä, kürgäzmädä meñnän artıq keşe bulğan inde. Soraşlar şunı kürsätkän, älege keşelärneñ 90%- abort ul ğäyepsez keşene üterü digän fiker belän kileşkän.

Ğafiulla Ğaziz, Çallı

XS
SM
MD
LG