Accessibility links

Кайнар хәбәр

Orenburda “Yaña Ğasır”nı özep pravoslaw ruxaniları çığışların birä başlağannar


Orenburnıñ Boğırıslan şähäre häm Äsäkäy rayonında ğömer kiçerüçe tatarlar xäzer atnasına ike tapqır tatar tapşıruları, yäğni “Yaña ğasır” urınına pravoslaw ruxanilarınıñ üget-näsixätlären qararğa mäcbür. Teläsä qaysı waqıtta tatar tapşıruların özü inde ğädätkä äylängän. Bu xaqta Bötendönya tatar kongressı Başqarma komitetı räise Rinat Zakirov:

“Yaña ğasır” kanalın qaraw millättäşlärebez söyeneçenä äylängän ide, ämma soñğı waqıtta anı özep, ruxanilarnıñ çığışların birä başlağannar. İnde xakimiätneñ añlatmaları buyınça “Yaña Ğasır”nı translyatsiäläü öçen burıç cıyılğan häm şunı xakimiät üze tülägän dä östämä itep pravoslaw tapşıruların kertergä bulğan

Burıç öçen pravoslaw tapşıruların kertü bu inde tatarlarnıñ xoquqların bozu. Çönki millättäşlär Orenburda salım tüläwçelär bulıp tora, şul säbäple bilgele translyatsiä öçen aqçanı da Xökümät tülärgä tieş. Kiresençä, alar monı üzläre oyıştırırğa tieş. Ämma xakimiätkä bolay eşläw, yäğni tatar tapşıruların özep pravoslaw ruxaniların kertü küräseñ otışlıraq. Ämma mondıy xälgä noqta quyu öçen tatar eşmäkärläre yärdämgä kilergä bulğan. Rinat Zakirov:

Orenburdağı eşmäkärlärne Qazanğa çaqırıp söyläştek häm alar şul 300 meñ sumnı tülärgä buldılar. Häm şuşı xakimiät orğannarı alarnıñ süzlären iskä alırğa tieşlär

Ämma xakimiät xätta bezneñ eşmäkärlär täqdim itkän aqçadan da baş tarta ikän. Rinat Zakirov belderüençä, ber yılğa “Yaña ğasır” tapşıruların translyatsiä öçen tüläw 300 meñgä töşä. İnde bu xaqta “Yaña Ğasır” teleradiokompaniäse citäkçese İlşat Äminov belän dä söyläşü bulğan. Çönki ike aradağı şartnamägä qul quyğanda bu mäs'älä kiläçäktä istä totılırğa tieşlege bilgelänä. Yaqın könnärdä İlşat Äminov bu mäs’älägä açıqlıq kertäsen äytkän. Tatar kongressı räise Rinat Zakirov äytüençä, küptän tügel massaküläm mäğlümat çaraları komissiäse utırışında da, töbäklärdäge tatar tapşıruları mäs’äläse kisken quyılğan. Rinat Zakirov:

Rusiäneñ küp kenä töbäklärendä Bötenrusiä teleradiokompaniäse tarafınnan yabılıp quyıldı. Şunıñ belän bergä qayberlären açtılar da. Ämma Ul'yanda, Çiläbedä, Omskida, Tomskida bu xäl qatlawlı. Meñlägän imzalar cıyuğa qaramastan näticäse yuq. Bez monı Rusiädä ikençe xalıq bulıp torğan tatarlarğa qarata iğtibarsızlıq dip qabul itäbez

Bötendönya tatar kongressı Başqarma komitetı räise Rinat Zakirov belderüençä, kiläçäktä bu mäs’älälärgä härdaim iğtibar üzägendä bulaçaq. Orenburdağı mäs’äläneñ çişeleşe belän dä bez sezne tanıştırıp barırbız.

Landış Xarrasova

XS
SM
MD
LG