Accessibility links

чәршәмбе, 7 декабрь 2016, Казан вакыты 11:56

Kazulin açlıq totıp närsägä ireşte?


Belarus oppozitsiäse citäkçese 5 yarım yılğa iregennän mäxrüm itelgän Aleksandr Kazulin, 53 kön açlıq totqannan soñ, qarşılıq ğämälen tuqtatırğa buldı. Anıñ töp taläbe – Belarustağı keşe xoquqları torışın BMOnıñ İminlek Şurasında tikşerü taläbe – ütälmäde. Läkin xalıqara häm ildäge reaksiäne iskä alğanda, bu ğämäl yuqqa bulmağan, diärgä bula.

Mart ayında ütkän xärämläşüle prezident saylawları waqıtında uram cıyınnarı oyıştırğan Aleksandr Kazulin 25 Martta 5 yarım yılğa iregennän mäxrüm itelgän ide.

Tağın ber oppozitsiä citäkçese Aleksandr Milinkeviç belän bergä alar prezident Aleksandr Lukaşenkağa qarşı köräşergä tırıştı. Räsmi sannarğa qarağanda, Lukaşenka tawışlarnıñ 83, Milinkeviç belän Kazulin 6 häm 2 protsentın cıyğan.

20 Üktäberdä Kazulin açlıq ğämälen başladı häm anı Belarustağı keşe xoquqları torışı BMOnıñ İminlek Şurasında tikşerelsä genä tuqtataçağın äytte.

Oppozitsiäneñ açlıq ğämällärenä elek tä iğtibar birmägän Belarus räsmiläre, bu yulı da qılın selketmäde. Räsmi mäğlümät çaraları 53 kön buyına tınlıq saqladı.

Uzğan atna Kazulinnıñ sälämätlege qaqşıy başlağaç, Milinkeviç anı açlığın tuqtatırğa çaqırdı. Bu taläp ütälerlek tügel, İminlek Şurası xättä Kuba mäsäläsen tikşerä almıy, çönki anda veto saluçılar bar, dide ul.

Alay da, batırlığına ixtiram belderep, Milinkeviç, sişämbedä Brusseldä Saxarov bülägen alğanda, Kazulinnı telgä aldı:

"Ul inde ike ayğa yaqın törmädä açlıq tota. Anıñ xäle bik naçar. Tormışı qurqınıç astında. Bu anıñ da büläge" dide Aleksandr Milinkeviç.

Taläbe ütälmäsä dä, Kozlulinnıñ açlığı yuqqa buldı dip äytergä yarıymı?

Belarus oppozitsiäse şuşı uq taläpne Zur 8-lek illäre citäkçelärenä citkerde.

8 Dikäberdä BMOnıñ keşe xoquqları wäkile Adrian Severin Kazulinnıñ sälämätlegenä tirän borçılu belderde.

Şul uq könne Belarusta 500läp keşe, Kazulinğa teläktäşlek belderep, ber könlek açlıq iğlan itte.

İkençe köngä Germaniäneñ Belarustağı ilçelege, Yewropa Berlege isemennän, Kazulinnı kiçekmästän irekkä çığarırğa çaqırdı.

12 Dikäberdä Quşma Ştatlarnıñ BMOdağı ilçese William Brencick Kazulin mäsäläsen İminlek Şurasınıñ yabıq işeklär artında ütkän utırışında kütärde.

Belarus oppozitsiäse bolarnı zur ciñü dip bäyäli:

"Kazulin bik awır açlıq kiçerep ışanmaslıq näticägä ireşte: Belarustağı wazğiät xalıqara säxnägä mende. Quşma Ştatlar süzen äytte, Milinkeviç Saxarov büläge aldı. Belarustağı xoquqsızlıqqa dönya iğtibar birä başlıy" di Xalıq Frontı räise urınbasarı Yuri Xadıka.

Kilgän xäbärlärgä qarağanda, amerikan ilçeseneñ bu mäsäläne kütärüe Rusiä ilçese Vitali Çurkinnıñ şul qädäre açuın çığarğan ki, ul xättä İran utırışınnan baş tartqan. Soñraq Rusiäneñ Tışqı eşlär ministrlığı monı Şura eşçänlegen Quşma Ştatlar mänfäğätenä taba boru tırışlığı dip bäyälägän belderü yasadı.

Ali Ğilmi
XS
SM
MD
LG