Germaniä xakimiatläre Hamburgqa oçqan “Aeroflot” şirkäte oçqıçlarındağı nurlanış däräcäsen tikşerüne ütende. “Praym-TASS” mäğlümät agentlığı, “Aeroflot”nıñ mätbuğat xezmätenä tayanıp, 20-läp oçqıç tikşerelergä tieş, dip belderä. Bu atnada Germaniä politsiäse Rusiä eşquarı Dmitri Kovtun bulğan berniçä urında poloní-210 ezläre taptı. Kovtun häm anıñ dustı Andrey Lugovoy, Federal' iminlek xezmäteneñ elekke xezmätkäre Aleksandr Litvinenko belän, Litvinenko Londonda poloní belän ağulanğan könne, oçraşqan ide.
