Accessibility links

чәршәмбе, 7 декабрь 2016, Казан вакыты 19:30

Başqortstan Tatar kongressın yabarlarmı?


Başqortstan Tatar kongressı eşçänlege tizdän tuqtatılırğa mömkin. Soñğı könnärdä respublika tatar cämäğätçelege arasında şundıy süzlär yöri başladı. Moña nigezlekne Tatar kongressına qarata başlanğan mäxkämä tikşerüläre birgän. Başqortstan Tatar kongressına qarata räsmi xakimiätlärneñ tiskäre mönäsäbäte xaqında moñarçı da mäğlüm ide. Xäzer inde eş mäxkämgä barıp citte. Küp kenä tatar oyışmaları wäkilläre fikerençä, Tatar kongressın yabıp quyarğa mataşu anıñ räise Ruşan Gallämovnı wazıyfasınnan töşerügä yünälderelgän.

Başqortstan Tatar kongressı Başqarma komitetı räise itep ike yıl çaması elek professor Ruşan Gallämov saylanğannan soñ, anı respublika räsmi xakimiätläre kürmämeşkä salışa başladı. Bu xäl äle dä däwam itä. Başqarma komitet üze dä ikegä bülende. Andağı qayber äğzalar xakimiätlär belän dus yäşäw yaqlı bulsa, ikençeläre monıñ tatar xalqına ber fayda da birmäyäçägenä işarä itä. Berniçä äğza küptän inde Başqarma komitetnıñ eşennän tämam çitläşte dä. Şul uq waqıtta respublika citäkçeläre älege räis Ruşan Gallämovnı wazıyfasınnan alu öçen, tizdän Tatar kongressınıñ qorıltayın ütkärergä cıyına ikän, digän xäbärlär dä tarala başlağan ide.

Tatar kongressına qarata mäxkämä eşe ni öçen açıldı soñ? Şuşı sorawğa cawap alu öçen, bez Ruşan Gallämovnıñ üzenä möräcäğät ittek. “Bezneñ oyışmanı Başqortstannıñ räsmi xakimiätläre moñarçı da önämi ide, xäzer uydırma säbäp belän bezgä qarata mäxkämä eşe açtılar, - di Ruşan äfände. – Moña Kongress Başqarma komitetınıñ üktäber ayı urtasında uzğan çirattağı utırışında qabul itelgän kisken qararlar säbäpçe. Çönki anda Başqortstandağı tatarlarnıñ problemaları barlıq kiskenlegendä yañğırağan ide. Şul utırışqa Başqortstan Yustitsiä ministrlığınıñ terkäw palatası xezmätkäre dä kilde. Ul könne kvorum öçen äğzalar sanı citsä dä, kvorum bulmadı, dip beldergän ul ministrlıqqa qaytıp. Menä şunnan soñ Başqortstan Tatar kongressına höcümnär mäxkämä aşa başlandı”.

Üz oyışmalarınıñ yabıluı ixtimallığın da inqar itmi Ruşan äfände. “Başqortstan şartlarında hämmä närsäne kötärgä mömkin, - di ul. – Östäge yuğarı citäkçelär quşa ikän, teläsä nindi oyışmanı yabıp quya alalar. Şul isäptän Başqortstan Tatar kongressın da.

Bu oyışmanı yabıp quyğaç ul bötenläy yuqqa çıqmasqa mömkin, dilär tatar cämäğätçelek oyışmaları wäkilläre. Räsmi xakimiätlär üzläre yañadan, Başqortstan Tatar kongressınıñ çirattan tış qorıltayın cıyıp, anıñ yaña räisen häm yaña Başqarma komitetı äğzaların saylap quyarğa mömkin. Ul oçraqta yaña sostav tulısınça xakimiätlärneñ kesä oyışması bulıp xezmät itäçäk, dip belderä kongressnıñ älege räise Ruşan Gallämov.

Fänis Fätxi, Ufa

XS
SM
MD
LG