Accessibility links

сишәмбе, 6 декабрь 2016, Казан вакыты 11:20

Yewropa Berlege citäkçeläre Yewropanı açıq qaldıra


Brüsseldä tämamlanğan 2 könlek Yewropa Berlege sammitında qaralğan töp mäsälä Berlekne kiñäytüne däwam itü mäsäläse buldı. Yewropa komissiäse prezidentı Jose Manuel Barroso bügen matbuğat oçraşuında bu sammit Yewropa Berlegeneñ açıq yort buluın belderde dide. "Berlekne kiñäytü qitğabızda tınıçlıq häm mullıq buldıru öçen iñ möhim çara. Bu sammit bezneñ monı däwam itü öçen öydä tärtip urnaştırırğa teläwebezne belderä. Bez Germaniä prezidentlığında konstitutsiä kileşüe eşen alıp baraçaqbız häm bu sammit bezneñ yortnıñ açıq bulaçağın belderä. Könbatış Balkan illärendäge omtılışlar öçen yaña etärgeç bar. Bez Törkiägä dä işelärne açıq qaldırabız" dide Barroso. Yaña yıl başınnan Romaniä belän Bolğarstan quşılğannan soñ Berlektä 27 äğza il bulaçaq. Kiçä sammita Yewropa Berlege citäkçeläre yaña äğzalarğa qırısraq taläplär quyarğa dip kileşte. Şul uq waqıtta alar Törkiä, Albaniä, Bosniä, Xorvatiä, Makedoniä, Montenegro häm Sergiäne kiläçäktä äğza itep alunı yaqlawların belderde. Yewropa Berlege citäkçeläre Holokostqa şik belderüçe konferensiä oyıştırğa İranğa kisken tänqit belderde. Brüsseldäge sammit axırında çığarılğan belderüdä Berlek Holokostnıñ tarixi fakt buluın tulısınıça yäki öleşçä kire qağunı xökem itä dielä. Belderüdä şulay uq İrannıñ uran bayıtunı tuqtatmawına qızğanıç belderelä.

XS
SM
MD
LG