Xäzerge zaman keşese öçen üz tiñen tabu, ğailä qoru- iñ citdi, qızğanıçqa qarşı yış qına xäl itä almaslıq problema .Awılda qızlar qalmaw säbäple öylänä almıy qartayğan yegetlär, şähärlärdä ata- anasınnan qalğan öç bülmäle fatirnıñ öç bülmäsendä yalğız qañğırıp utırğan illedän uzğan apa-señellär, tatar konsertlarına, dini bäyrämnärgä änilärenä iärep yöri torğan qırıqnı uzğan”malaylar”- bolar bügenge kön sivilizatsiäse cimeşläre. Peterburgta da bu problema şaqtıy kisken tora. Ä bit qayçandır piter tatarlarınıñ andıy probleması bulmağan. Çönki baştaraq tatarlar Peterburgta kümäkläp –bistä bulıp yäşägän, ber bersen yaxşı belgän, üzläreneñ “Cihan äbiläre” dä bulğan
.Soñınnanraq tanışular “Şärıq yortında”, küpsanlı tatar mäktäplärendä uzğan. Watan suğışınnan soñ mäktäplär dä yabılğaç, balaların başlı-küzle itü probleması ata- analar qulına qalğan.Tarixçı,”Tatarı Sankt-Peterburğa”kitabı avtorı Dawt ağa Äminovnıñ tormış iptäşe Mädinä apa süzlärençä, illençe yıllarda citkän qız-ulları bulğan ğailälär, çiratlaşıp, üz fatirlarında yäşlär kiçäläre uzdırğannar.Kiçälärgä tanışları täqdime belän ürnäkle tärtiple yeget häm qızlar ğına çaqırılğan.Üzen naçar yaqtan kürsätüçelär öçen mondıy kiçälärgä işeklär yabıla torğan bulğan. Şulay itep, ğailägä oçraqlı keşelär elägü qurqınıçı kimegän.
Annan altmışınçı yıllarda kiçälärne törle “qızıl poçmaqlarda” qaçıp- posıp uzdıra başlağannar.
Alarğa almaşqa klublar, kafelar kilgän, ä tanışu probleması qalğan. Tuqsanınçı yıllarda üzläre tanışa aludan ömetläre özelgän törle yäştäge qız-xanım, ir-yegetlär fotograf Mönirä Moratovağa yärdäm sorap möräcäğät itä başlağannar. Şulay itep, Peterburgta tanıştıru xezmäte”Xanuma”barlıqqa kilgän.
Xanumanıñ üzen dä tıñlap qarıyq: möräcäğät itüçelärne fotosurätkä töşerep,nindiräk keşe belän tanışırğa teläwen açıqlap, tanışlarım arasınnın variantlar täqdim itä idem. Cıyılır, küzgä küz qaraşıp söyläşer urın bulmağaç, bik qıyın ide. Menä şundıy mömkinçelekne bügen Millätlär yortı birde, bügen räxätlänep tanışu kiçäse uzdırabız, söyläşäbez, cırlaşabız”,-dip quana Xanumabız Mönirä xanım.
Şunısı quanıçlı, kiçäneñ programmasın tözüçelär häm alıp baruçılar yäşlär.Universitetnıñ fizika fakul''tetı aspirantı Nail Väliäxmätov Peterburgta tuıp üskän, telne dä yaxşı ğına belä, kiçäneñ tatarça öleşen ul alıp bardı.
Äytergä kiräk, kiçädä telne aktivlatıp cibärügä, xalıq cırların iskä töşerügä yunälderelgän bik küp uyınnar , konkurslar ütkärelde.Piroğlı çäy östäle artında törle yäştäge millättäşlärebezneñ söyläşep süzläre betmäde., kölü- şayartu tuqtap tormadı. Yäşlär desertqa keçkenä genä konsert programması da äzerlägän idelär.Xalıq bik qänäğät bulıp, yaña yıldan soñ tağın oçraşırğa süz quyışıp, taralıştı.
Rişat äfände fikerençä, menä şulay, qul quşırıp utırmıyça, üzebez oyıştırıp, üzebez qatnaşıp yörsäk kenä bu kiçälärneñ kiläçäge bulaçaq.
Şağirä Wiliä xanım:”Başqortstanda yäşägändä millätemneñ, telemneñ qäderen belmägänmen.Menä xäzer çittä yörep, Uqrainada küp yıllar yäşäp, Peterburgta torıp telneñ qäderen, tämen belergä öyrändem, räxätlänep söyläşäm. Mondıy kiçälär bik kiräk “, -di.
