Accessibility links

якшәмбе, 4 декабрь 2016, Казан вакыты 07:01

Qırğızstan xökümäte urınınnan kitte


Sişämbedä Qırğızstan xökümäte urınınnan kitte. Premier-ministr Feliks Kulov bu adımnı yaña konstitutsiäne ğämälgä quyu kiräklege, xakimiätneñ başqarma häm qanun çığaru tarmaqları arasında bäyläneş betüe belän añlattı.

Premier-ministr Feliks Kulov süzlärençä, xökümätneñ çigenü adımı parlament saylawların tizlätü maqsatı belän yasala. Qırğıstanda soñğı parlament saylawları 2005 yılda ğına ütkän ide. Läkin uzğan ayda yaña konstitutsiä qabul itelde. Prezidentnıñ ber öleş wäkälätläre parlamentqa tapşırıldı. Yaña konstitutsiägä kürä parlamentta 75 urınına 90 urın bulırğa häm deputatlar ber mandatlı bülgelärdän tügel, partiä isemlekläre belän saylanırğa tieş. Yağni, xäzerge parlament yaña konstitutsiägä inde turı kilmi.

"İñ möhime xäzer reformalarnı däwam itü öçen yaña parlament saylarğa kiräk. Konstitutsiä nigezendä, deputatlar yaña parlament saylanğançı eşli ala. Şuña kürä, deputatlar xäzer kitäme, soñraqmı – bu möhim soraw tügel" di Qırğızstan premierı-ministrı.

Kulovnıñ mantıyğı ğadi: yaña xökümät küpçelekkä ireşkän partiä nigezendä tözelergä tieş. Xäzerge parlamentta andıy partiä yuq, dimäk, yaña saylawlar ütkärergä kiräk.

Östäwenä, Kulovnıñ urınbasarı Daniar Usenov süzlärençä, xäzerge parlamentnıñ qarar qabul itü wäkäläte dä yuq:

"Bügen deputatlar 38 tawış belän qarar qabul itä. Bu ğämäldäge konstitutsiäne bozu bulıp tora. Çönki, yaña konstitutsiä nigezendä 90 deputat bulırğa tieş, dimäk, kvorum – 46, qararlar kimendä 46 tawış belän qabul itelergä tieş" di premier urınbasarı.

Parlamentnı taratuğa kilgändä, Kulov bu mäsäläne açıq qaldırsa, anıñ urınbasarı qatğıyraq qaraşta. Daniar Usenov fikerençä, xäzer parlament ta üzen üze taratırğa tieş.

Prezident Qormanbäk Baqıev xökümätneñ urınınan kitü qararın bügen ük qabul itte. Häm dä, ixtimal, waqıtınnan alda saylawlarğa äzerlek räweşendä, Üzäk saylaw komissiäse başlığı Toyğonali Äbderaimovnı wazifasınnan buşattı.

Ali Ğilmi
XS
SM
MD
LG