Accessibility links

пәнҗешәмбе, 8 декабрь 2016, Казан вакыты 03:09

Çallılılar Daqarğa kitte


"Dakar" ralliı bıyıl da ğädättägeçä, Awrupa häm Afrikanıñ altı ile buylap ütkärelä. Şunısın da iskärtik, uzışlar 1978 yıldan başlap 29 nçı tapqır uzdırıla. Yarış 6нчы ğinwar könne Portuğaliä başqalası Lissabonda başlanıp kitä häm İspaniä, Maroqqo, Mavritaniä Mali häm Seneğal cirläre aşa ütä. 21 nçe ğinwarda Seneğal başqalasına barıp citkäç, Alsu kül digän urında finiş etabı bulaçaq. Ul bu yulı ayırım yarış räweşendä, "Dakar" kuboğı dip ütkärelä. Aña qädär äle sigez meñ yarım çaqrımnan artıq barası, şunıñ 5 meñe- tizlekkä uzışlı yullarğa turı kilä. Komandanıñ sostavı xaqında KamAZnıñ mäglümät säyäsäte departamentı baş belgeçe Fähim Cihanşin Azatlıqqa bolay dide:

"İnde "KAMAZ-master" komandasına kilsäk, yegetlär bu yarışlarda moña qadär barlığı cide tapqır ciñep çıqtılar, soñğı biş yılda- rättän. Bu yulı komandada berqädär üzgäreşlär bar. Soñğı "Daqar"da berençe urınnı alğan Firdäwes Käbirov bıyıl yarışqa komanda citäkçeläreneñ berse bularaq bara, anıñ KamAZ rule artındağı urının ikençe ber tatar yegete İlgizär Märdiev alaçaq. Aydar Belyaev bu yulı da ikençe ekipaj şturmanı bulıp bara. Vladimir Çağin qabat üzeneñ iptäşläre belän bergä, şturmanı- Semen Yakubov, mexaniğı- Sergey Sawostin. Öçençe ekipajnı Sergey Reşetnikov citäkli.

Uzış maşinası KamAZ Ekstrim dip atala, konstruksiä yağınnan ul bu yulı ällä ni zur üzgäreşlär kiçermägän, dilär. Şulay da, komandanıñ bötenläy yaña, tağın da küätleräk häm çıdamlıraq texnika äzerlägäne mäğlüm. Läkin 2007нче yıl yarışlarına anı ölgertä almaslar kebek."

Bügen "KAMAZ" uzışçılarnı Mäskäwgä ozattı, Qızıl Mäydannan tantanalı start digän ğädäti tamaşa 23 dekabergä bilgelängän.

Yulğa çığar aldınnan komandanıñ yaña avtomobil' sportı üzägen açu märäsime buldı. Bu bina äle, döresen äytkändä, tözelep tä betmägän. Monda maşinalarnı yarışlarğa äzerläw, yal itü häm sport belän şöğellänü öçen böten şartlar bulaçaq, tormış-könküreş häm eş öçen başqa uñaylıqlar da qaralğan. Kiläçäktä bu üzäkneñ böten Rusiä däräcäsendä dä sportçılar äzerläw urınına äwerelüe ixtimal. Şunı küzdä totıp, tözelä dä inde ul. Bıyıl da, Çallı avtomobil'läre ekipajlarınıñ töp köndäşläre Gollandiä, Almaniä, Çexiä wäkilläre bulır dip kötelä. İnde 60 yäşen tutırğan çexiä uzışçısı Karel Lopraiz şundıylarnıñ berse.

Ğafiulla Ğaziz,Çallı

XS
SM
MD
LG