Accessibility links

Кайнар хәбәр

Rusiädä iminlek xezmäte wäkilläre köne


20 dekaber Rusiä iminlek xezmäte oyışmaları köne. Şuşı uñaydan älege oyışma xezmätkärlärenä qotlaw xatları ağıldı. Respublikanıñ matbuğat çaraları Rüsiä iminlek xezmäte oyışmasınıñ Tatarstan bülekçäse citäkçese, general Yevgeniy Vdovinnan äñgämälär aldılar. “Vremya i dengi”, “Respublika Tatarstan” gazetaları iminlek xezmäte oyışmalarınıñ bügenge xäle belän qızıqsınğan. Yevgeniy Vdovin:“ Terroristlarnıñ, ekstremistlarnıñ Tatarstanda citdi törkemnäre yuq” digän. Medianews saytında çit il jurnalistı Klaus-Xelge Donat Rüsiä iminlek xezmäte oyışması xaqında mondıy süzlär yaza; “Rusiä prezidentı bulıp elekkege iminlek xezmäte citäkçese, könçığış Germaniädäge şımçı Vladimir Putin quyılğaç, Rusiä iminlek xezmäte oyışması köneneñ däräcäse bermä-ber arttı, bäyräm köngä äwerelde. Maxsus xezmät wäkilläre ğorurlanıp üzlären çekistlar dip atıylar Bu Lenin çorında bulğan yäşeren politsiä xezmätennän qalğan miras. Putin Rusiä iminlek xezmäteneñ töp maqsatı, däwlätne eçke häm tışqı doşmannardan saqlaw, Watannıñ, anda yäşäwçe grajdannarnıñ qurqınıçsızlığın tä'min itü di. Läkin Stalinnıñ ĞULAĞınnan uzğan millionlağan ölkän buın wäkilläre Putinnıñ bu süzlärenä qarşı çığa alırlar ide. Tarixçılarğa da iminlek xezmäteneñ bik küp gönahları bilgele. Ni qızğanıç, Rusiälelärneñ berse dä bu xaqta qıçqırıp äytergä batırçılıq itmi !” – di çit il jurnalistı. Moña cawap ta bar, çönki iminlek xezmäte oyışması belän bäylänü yünlegä kitermägänen äbi-babaylar da, alarnıñ ulları-qızları, onıqları da äybät belä. 20 dekaberdä “Exo Moskvı” radiosı Rusiä iminlek xezmäte wäkillärennän açı yumor belän turıdan-turı efirda kölä. Monı işetkän Qazanlılar eçlärennän söyenep tä quyalar, läkin şulay uq qıçqırıp äytergä şöllilär. Respublika matbuğatına birgän äñgämäsendä Rüsiä iminlek xezmäte oyışmasınıñ Tatarstan bülekçäse citäkçese Yevgeniy Vdovin;“ “Xizb ut-Taxrir Äl-İslami” ekstremistik törkemneñ qorıyğına bastıq” di. Qazannıñ 1000 yıllığı aldınnan terror ğämälläre qılırğa mömkin bulğan, iminlek xezmäte oyışması üze isem birgän “İslam cämäğäte” törkeme keşelären Tatarstannıñ Prokuraturası yärdäme belän eşlären sudqa birgännär. Monda islam dinendäge keşelär bar dip añlarğa kiräkmi di Tatarstannıñ irekle jurnalistları, bu säyäsät, Rusiä citäkçelegeneñ İslam dinenä qarata alıp barğan tomanlı säyäsäte. Tatarstan möftieneñ urınbasarı Wälulla xäzrät Yaqup iminlek xezmäte oyışması xaqında mondıy süzlär citkerde; - Rusiä däwlätendä eçke häm tışqı doşmannar bulğan kebek, iminlek xezmäte oyışmaları bulu da normal' küreneş. Bez alar belän Watan iminlege, tınıçlığı öçen bergäläp eşlärbez dip ışanam. Xäzerge köndä terrorğa qarşı eşçänlek alıp baruları da ğädäti küreneş. Möftiättäge keşelärne iminlek xezmäte wäkilläre gel küz uñında totuları berkemgä dä ser tügel. Läkin şul uq möftiättägelär repressiä yıllarında tatar mullarınıñ Rusiä iminlek xezmäte tarafınnan ülemgä, çit cirlärgä sörelüläre xaqındağı qanlı tarixnı iskä aldılar. Mäskäwdä urnaşqan elitanı öyränü üzäge citäkçese, sotsiolog Ol'ğa Kriştanovskaya Rüsiä xalqınıñ 26 protsentı qayçandır KGBğa, iminlek xezmätenä bäyle bulğan yäki eşlägän di.Ul;“Putin prezident bulu belän iminlek xezmäte oyışmaları artıq qılana başladılar, iqtisat, säwdä kebek başqa ölkälärne üs qullarına aldılar, şunnan soñ il belän prezident tügel, ä maxsus xezmätlär, rusça äytkändä FSB idärä itä digän fiker tua” - di Ol'ğa Kriştanovskaya. Röstäm İsxaqi
XS
SM
MD
LG