Accessibility links

шимбә, 3 декабрь 2016, Казан вакыты 20:51

Blair İrandağı ekstremizmğa qarşı berläşergä çaqırdı


Britaniä premier-ministrı Tony Blair İrannıñ xäzerge citäkçelegen Yaqın Könçığıştağı tınıçlıqqa töp kirtä dip atadı. Yaqın Könçığış illärenä säfär qılğan Blair İrandağı "ekstremistlarğa" qarşı berläşergä, andağı salmaq köçlärgä yärdäm kürsätergä çaqırdı.

Şuşı belderüen Blair çärşämbedä Dubaida, eşquarlar häm jurnalistlar belän bulğan oçraşuda yasadı. İran prezidentı Mäxmüt Äxmädinecad xökümäte bar töbäkkä qurqınıç tudıra dip, ul anıñ nindi qurqınıçlar tudırğanın sanap kürsätte:

"İran xökümäteneñ ayırım äğzaları açıqtan-açıq Ğiraqta terrorçılıqnı xuplıy, Liban xökümäten bärep töşerergä tırışa, Fälästindä tınıçlıq urnaştıru tırışlığına ayaq çala, berük waqıtta, Holokostnı kire qağa, atom qoralı buldırırğa tırışa" di Britan premierı.

İñ borçığanı şul, dide Blair, dönyanıñ zur öleşe bu xällärgä bitaraf qaraşta tora.

Yaqın Könçığışta terrorçılıqnıñ köçäyüenä näq menä Quşma Ştatlar häm Britaniäneñ xärbi ğämälläre kiterde, digän qaraşnı Blair kire qaqtı. Töbäkneñ bar salmaq citäkçelären ul demokratiä belän İran ekstremizmı arasındağı köräşkä quşılırğa çaqırdı.

"Bez İran xökümäte tudırğan yanawlarnı añlarğa tieş. İran xalqı, yä bar citäkçelege tügel, ä xäzerge säyäsätne bilgeläwçelär. Alar bezne Ğiraqta, Libanda, Fälästindä töp başına utırtırğa tırışa. Bezneñ cawap – alarnıñ niäten faş itü, moña qarşı berläşü häm alarnıñ üzlären töp başına utırtu bulırğa tieş" di Britan premierı.

Şuşı öndäwen Blair 5 könlek säfär barışında berniçä tapqır qabatladı. Ğäräp Ämirleklärenä qädär ul Törkiä, Mısır, İzrail, Fälästindä buldı.

Blair Mısırnıñ İzrail belän Fälästin arasında aradaşçılıq itüenä xuplaw belderde, başqa illärne Ğiraq xökümäten yaqlarğa çaqırdı, Dubai şähäre Gaza häm Basra qalaları öçen iqtisadi täräqqiät ürnäge bula ala dide.

Britan premierı şulay uq Fälästin prezidentı Mäxmüt Abbas belän İzrail premier-ministrı Yäxüd Olmert arasında tiz arada oçraşu ütkärergä, solıx protsessın yañartırğa, Abbasqa Xämäs törkemenä qarşı köräşendä yärdäm itergä çaqırdı.

Bu Blairnıñ soñğı çit il säfärläreneñ berse buldı. Distä yıl xakimiättä torğan Blair kiläse yıl urtasnda wazifasınnan kiter dip kötelä.

Ali Ğilmi
XS
SM
MD
LG