Accessibility links

якшәмбе, 11 декабрь 2016, Казан вакыты 05:21

Eşmäkärlär kiläçäge citäkçelärgä bäyle


Tatarstan Prezidentı Mintimer Şäymiev respublikada keçe eşmäkärlek üseştä buluın assızıqladı. Ämma älege üseş öçen köräşkännärne, küpme tir tükkännärne barı monı tatığan eşmäkärlär üzläre genä belä. Qorıltaynıñ plenar utırışı 4 säğät tiräse däwam itsä dä, eşmäkärlär üzläre monnan älläni qänäğät qalğan dip äytep bulmıy. Xätta Qorıltayda Şäymievtan tış, Premyer-ministr Röstäm Miñnexanov, Däwlät şurası räise Färit Möxämmätşin, Däwlät Duması räise urınbasarı Oleg Morozov häm Rusiä iqtisat üseş häm säwdä ministrı urınbasarı Andrey Şaronov qatnaşsa da.

Ägär çit illärdä keçe eşmäkärlek inde mäğlümat texnologiäläre däräcäsendä barsa, Tatarstanda isä ul äle waq häm ğadi – berär kibet açu yäki şirqat buldıru mäsälän. Läkin monısında problemalar citärlek…Anıñ iñ berençese möğayın banklardan kredit aludır. Tatarstannıñ keçe häm urta qullı eşmäkärlär assotsiatsiäse başqarma direktorı Nail' Ğaniev

Kredit birergä telmäwçelär küp. Ämma yä zalog sorıylar, yä inde sineñ eşeñ başlanğıç bulmawı taläp itelä.

Bilgele ki, banklar şulay uq eşmäkärlär tösle aqça eşläw yağın qarıy. Alar bik zur protsentlar bilgelilär. “Aq Bars” bankınıñ idärä räise Robert Musin isä bezdä törle programmalar bar dip assızıqlap uzdı

Bez bu eşne iñ iqtisadıy dip tababız. Urta häm keçe eşmäkärlärgä 9 ayda 17 milliard sum kredit birdek, alarnıñ äcätläre xäzer bezgä 6 milliard sum.

Şäymiev Qorıltayda keçe eşmäkärlekne üsterü öçen östämä wençur fondlar açaçaqbız dide. Vençur fond ul banklar kredit birmägändä, däwlät aqça birä torğan fond.

Kredittan tış bina alu mäs’äläse tora, çönki xäzer anı başta bäygedä otarğa kiräk. Ä anıñ öçen aqçalı bulu zarur, şulay uq monopoliägä iä, yäğni energiä häm ğaz öçen xuca buluçılar üzläreneñ şartların quya. Bu xaqta Nail' Ğaniev

Siña ut häm gaz öçen ber külämdä kvota bilgelänä. Ägär kübräk betersäñ dä ştraf tüliseñ, azraq betersäñ dä kübräk tüliseñ. Anı tögäl turı kiterep bulmıy.

Nail Ğaniev äytüençä, cirgä bäya törle buluı da zur mäs'älä. Çönki türälär üzläre bäya quya häm eşmäkärlär anı tülärgä mäcbür. Monnan tış närsäder tözü öçen cir alu şaqtıy ozaqqa suzıla ikän. Bu problemalarnıñ barısı da 4 säğät barğan Qorıltayda qaraldı. Nail Ğaniev üz fikerlären bolay dip belderä

Türälär üz qaraşın, eşmäkärlär üzläreneken yaqlarğa tırışa. Prezident kemneñ yağında bulsa şularğa yäşäwe ciñelräk bulaçaq. Ägär Şäymiev monopoliä iälärenä Tatarstan iqtisadi üseşe öçen eşmäkärlärgä yul birergä kiräk dip añlatsa üzgäreşlär bulaçaq. Ägär alar elekkeçä üzläre turında ğına uylasalar xäl üzgärmiäçäk. Bu turıdan turı citäkçelektän tora.

Nail Ğaniev äytüençä xäzer eşmäkärlär yunäleşenä bötenläy qurqınıç yanıy. Çönki Tatarstanğa Mäskäwneñ zur kibetläre ütep kerep beznekelärne qısınqılıy başladılar. Ä Rusiä Bötendönya Säwdä Oyışmasına kergäç bu qurqınıç ikelätä artaçaq.

Landış Xarrasova

XS
SM
MD
LG