Accessibility links

якшәмбе, 11 декабрь 2016, Казан вакыты 16:56

Mojga milli-mädäni möxtäriätenä 5 yıl


Udmurtiädä berençelärdän bulıp milli xäräkätkä Mojga töbäge quşıldı. Şähärdä tatar üzäge oyıştı, anıñ berençe citäkçese İlgiz Qadıyrov buldı. Respublikada berençelärdän bulıp milli bäyrämebez sabantuyın da mojgalıylar başta şähär külämendä uzdırdı, soñraq Mojgadağı milli bäyrämebez respublika bäyräme statusın aldı.

Milli – mädäni möxtäriät tözü buyınça yaña qanun ğämälgä kergäç, mojgalıylar tağın xalıq cıyını uzdırıp, möxtäriätne berençe bulıp räsmi terkäwgä dä ireşte. Mojga, beraz soñraq Balezino rayonında oyışqan milli-mädäni möxtäriät respublikaküläm oyışmanı terkäwdä nigez buldılar.

Mojga şähärendä cirle milli-mädäni möxtäriätne terkäwgä inde biş yıl waqıt uzğan. Bu data milli xäräkät aktivistlarınıñ eşlärenä yomğaq yasaw öçen säbäp tä buldı. Başqarılğan ğämälläre dä bar, milli xäräkätkä kilep quşılğan yaña keşelär dä az tügel, dip urtaqlaştı telefon aşa äñgämädä möxtäriätneñ räise İlgiz Qadıyrov.

İñ möhime, milli-mädäni möxtäriät Mojga şähäreneñ ike mäktäbendä tatar tele sıynıfların, balalar baqçasında tatar törkemen açuğa ireşte, şulay uq sänğät kollektivı da uñışlı ğına eşläp kilä.

Mojgada milli-mädäni möxtäriätneñ biş yıllığı uñayınnan tantana da bik küñelle uzdı, dip däwam itte İlgiz Qadıyrov.

Anda cirle administratsiädän wäkillär, Udmurtiä respublikasınıñ milli-mädäni avtonomiäse räise İrek Şäripov, tatar ictimaği üzäge başlığı Fnün Mirzayanov, Balezino milli—mädäni möxtäriätennän wäkillär häm cır kollektivı, älbättä, Mojgadan sänğät ostaları qatnaşqan.

Milli-mädäni möxtäriätneñ eşenä bäyä birep, anıñ aktiv äğzalarına milli säyäsät ministırlığı häm cirle administratsiäneñ Maqtaw xatları, gramotaları tapşırılğan. Möxtäriätneñ eşçänlege xaqında çığışlar, sänğät ostaları başqaruında cırlar, iyüllär belän aralaşıp alıp barılğan. Eşlärenä bäyä birü, näticä yasaw, üzara aralaşu kiläçäkkä bilgelängän ğämällärne tormışqa aşıru öçen därt östäde dip urtaqlaştı möxtäriätneñ räise İlgiz Qadıyrov.

Xämidä Ğayfullina, Udmurtiä

XS
SM
MD
LG