Accessibility links

шимбә, 3 декабрь 2016, Казан вакыты 12:41

Dilä Bulgakovanıñ “Dawıllar yögänlädem” digän yaña kitabı dönya kürde


Azatlıqnıñ Qazan studiäsenä “Şatlıqlarım belän kildem äle, Qazanğa”,- dip kilep kerde yazuçı, şağirä Dilä Bulgakova. Ul, äle näşriät buyawları ise dä betmägän, “Dawıllar yögänlädem”digän kitabın açtı. Ufada yäşäwçe Dilä Bulgakova tatar telendä şiğerlär, xikäyälär, näserlär, parçalar icat itä. Ul üze hönäre buyınça ğömere buyı şäfqät tutaşı bulıp eşläde. Häm ul eşlägän urında däwalanuçılar irektän mäxrüm itelgännär ide.

Dilä Bulgakova ul üze Başqortstannıñ Qırmısqalı rayonınnan Bozayaz yaqlarınnan. Bu töbäk üzeneñ bik küp kürenekle ädipläre belän dä dan totqan töbäk. Dilä Bulgakovanıñ şäfqät tutaşı ikänen küplär belmi dä torğannardır äle. Şuña da qaramastan, ul härwaqıt icatta. Ul tatar xalqına kübräk cırları belän tanış.. Çönki Dilä Bulgakovanıñ küp kenä şiğerlärenä kompozitorlar köylär yazdılar. Anıñ “Qır qazları” digän cırı 60-70 nçe yıllarda uq inde Fidan Ğafarov başqaruında bik populyar bulıp kitkän ide.

Xäzer anıñ cırların İdris Ğaziev, Aydar Ğalimov , Zöfär Bilalov cırlıylar. Häm soñğı yıllarda anıñ cırların üz repertuarına almağan cırçılar da bik siräk.

Dilä Bulgakovanıñ “Dawıllar yögänlädem” kitabı kürenekle başqort şağire, ädip, İbrahim Abdullinnıñ şağirä turındağı süzläre belän başlanıp kitä. Soqlanıp tuymaslıq talantlı, neçkä, näfis küñelle yazuçı ul, Dilä Bulgakova, di ul .

Sufian Povarisov Dilä Bulgakovanıñ icatı turında: “Ul üzeneñ äsärlärendä keşelek- keşeleksezlek, şäfqat'lelek- şäfqat'sezlek, maturlıq- qotsızlıq mäs’älälären üzäkkä quya, keşelärneñ yöräk serlären añlarğa tırışa, häm ayırım äsärlärendä üzen dä serlär alihäse itep tanıta, di.

Dilä xanım bezneñ studiägä kerep kenä çıqqan çağında, Azatlıq radiosınıñ tıñlawçılarına Ufa şähäreneñ “Kitap” näşriätında basılıp çıqqan“Dawıllar yögänlädem” kitabı turında üze söyläde. Kitapnıñ berençe bülegendä tuğan yaq, tuğan cir, tabiğät, mäxäbbät, turında bulsa, ikençe bülegendä dini şiğerlär , mönäcätlär.

Kitapnıñ öçençe bülegendä urın alğan xikäyälär parçalar, näserlärneñ töp geroylarınıñ prototipları törmädä utırğan keşelär. Alar arasında törlelär bar , törle yazmışlar bar. Keşe yazmışlarında xatalar da bula. Şunıñ öçen anda utırğan keşelärgä miherbanlı , şäfqät'le bulırğa kiräk” di ul .

Dilä Bulgakovanı mäktäp balaları da bik yarata.Anıñ şiğerlären yäşlär dä yarata. Äle 2006 yılda tağın anıñ “Bez bit tallar näselennän” digän şiğerenä yäş cırçı Närkäs üze köy çığarıp häm fonogrammasın da üze yazğan.

Dilä Bulgakova ul talantlı ädibä genä tügel, cämäğät eşleklese dä. Ufanıñ İxlas mäçetendä xezmäten quya. Räsem töşerüdä dä bik osta. Anıñ tağın ber üzençälege bar. Ul izgelek teläp, matur itep çigep duslarına qalfaqlar büläk itä. Tatarstannıñ xalıq artistçası Zöhrä Säxäbieva “Dilä xanımnıñ çikkän qalfaqları - sın sänğät äsärläre. Encelärdän genä näqışlap, miña büläk itkän qalfağın kiep, xalıq cırların başqaram,: mönäcätlär äytäm. Ul- saf yöräkle, yuğarı ruxlı, izge küñelle, yärdämçel şäxes ” digän ide anıñ turında İxlas mäçetendä “Tayan Allağa” dip isemlängän tamaşa barışında.

Menä “Söyembikä” jurnalınıñ yubileyına da Dilä Bulgakova çikkän qalfaq büläk itte.

“Ğömer çatlarında ciläm äle,
Yullar äydi alğa çaqırıp,
Äy, zamandaş, bezdän büläk bulıp,
Torıp qalsın cirdä yaxşılıq !
dip tämamlıy ul “Dawıllar yögänlädem”digän kitabın.

Mälikä Basıyr

XS
SM
MD
LG