Accessibility links

якшәмбе, 11 декабрь 2016, Казан вакыты 09:02

İdris Gaziev “Azatlıq” radiosınıñ maxsus bülägen aldı


20-21 dekaber könnärendä Qazanda Tatar çırı 2006 festivale uzdı. Ğädättägeçä älege cır festivale Piramida küñel-açu üzägendä ütte. Tatar estradası tormışınıñ iñ zur häm möhim çaralarınıñ berse bulğan tatar cırı festivale ike kön genä ütkärelüenä qaramastan, bıyıl da bik qupşı, tantanalı häm üzençälekle itep oyıştırıldı. Tatar estradası tormışında iñ ähämiätle yıl waqiğası - "Tatar cırı" festivale bıyıl cidençe tapqır ütte. Tatar konsertları arasında iñ däräcälesenä äwerelgän Tatar cırı festivale bıyıl da tamaşaçılarnıñ iğtibarın cälep itte. Bilet bäyäläre 400 sumnan başlap ber meñ sumnan da qıybatraq bulsa da, xalıq, aqçasın jällämiçä, zal tutırıp kilgän. Däräcäle türälär, rayon citäkçeläre, törle ministrlıq wäkilläre belän bergä, yal itärgä yäşlär, urta buın keşeläre, äbi – babaylar da kilgän ide. Şunı da äytergä kiräk, bıyılğı festival'neñ byudjetı 11 million sumğa yaqın buluı, anıñ texnik yaqtan cihazlanuı iñ populyar rus häm çit il festival'lärennän kim bulmağanlığın kürsätte. Festival'neñ berençe köne kötelmägän duetlarğa, yaña isemnärgä, tanış xitlarğa häm ör-yaña cırlarğa bay buldı. Bıyıl säxnädä "Bars-media" kompaniäse inde öçençe "Yoldızlar fabrikası" yäşlären täqdim itte. Bu yulı da yäşlär inde tanılğan artistlar belän duetta cırladı. Ä menä 21 dekaber kiçendä “Tatar cırı-2006” Xalıqara estrada festivaleneñ gala-konsertında ağımdağı yılda yañğırağan iñ populyar tatar cırları häm cırçılarına "Altın bars"lar tapşırıldı. Bıyıl alarnıñ sanı 20 gä citte. Bıyılğı festival'neñ töp yañalığına kilsäk, ul yıl däwamında populyar cırlar yünäleşe buyınça tügel, ä 17 törle nominatsiä buyınça bilgelände. Alar 2006 yılnıñ iñ yaxşı cırı, yıl açışı, iñ yaxşı al'bom, iñ xalıqçan cırçı, iñ yaxşı cırçı, iñ yaxşı klip, iñ yaxşı duet isemnärenä bülengän ide. Äytergä kiräk, bıyıl 5 cırçı häm estrada törkeme “barsı”nı berençe tapqır aldı. Alarnıñ qayberläre tä'sirläre belän Azatlıq radiosı belän dä urtaqlaştı. “- Şul qädär başta dulqınlanu ide. Xäzer şul qädär üzemne bäxetle toyam. “Tatar cırı”nda berençe “Altın barsım”. Bu barsqa min bik yıllar däwamında kildem. Menä inde 7 yıl min säxnädä eşlim, şunıñ ike yılı Tatarstanda. Oyıştıruçılarğa häm tamaşaçılarğa bik zur räxmätlemen. - Şatlıq belän dulqınlanu bergä quşıldı. - Uzğan yıl min fabrikantqa idem, mine zur säxnägä Xäniä Färxi alıp çıqqan ide. Ä menä xäzer min alar belän ber rättän Altın barsqa layıq buldım.” Ä menä Salawat Fätxetdinov, Aydar Galimov häm Xäniä Färxi cidençe tapqır bars sınnarın layık buldı. İnde 7 yıl rättän Tatar cırı säxnäsendä çığış yasasalar da dulqınlanu xislären alar da yäşermäde. “- İnde öyränep tä beterergä waqıttır dulqınlanmasqa da. 7 tapqır bulsa da barıber waqiğa. Älbättä festival'gä qarata törle reaksiä bulaçaq, kemder anıñ ber yağın, kemder ikençe yağın kürsätäçäk. Ämma anıñ töp eşe barıber tatarnı berläşterü. Minemçä, niçek kenä bulmasın bu festival' kiräk, tatar cırı isemen alğan ikän, şuña tuğrı bulıp qalırğa tieş. Bälki haman da ber ük kıqşelär tuydırıp ta betergänder, ämma ägär dä ikençe yılğa layıqlı yäşlär kilsä, bezgä urın qalmasa min üpkälämäm. - Bıyıl inde minem 7 Altın barsın, ğorurlanam. Tatar cırı festivalenä kilsäk, bu bik kiräkle äyber. Çönki ul bügenge köndä tatarnı berläşterüçe bulıp tatar. Tatar xalqı bit ul böten dönya buyınça sibelgän, ämma tatarnı tuplap, berläşterep toruçı ul tatar cırı. Häm bügen Tatar cırınıñ bäyräme, nindi genä tänqitlär buluğa qaramastan, min festival'ne bik xuplıym. Räxmätläremne äytäm.” Şulay uq bu yulı iñ populyar dip tabılğan cırçılar arasında iñ yaxşı çit il cırçısı nominatsiäse dä bar ide. Läkin küplär ğäcäplängänçä, bu yünäleştä kürşe Başqortstannan İdris Gaziev ciñep çıqtı. Äytergä kiräk, İdris Gaziev Altın Barstan tış, Azatlıq radiosınıñ maxsus büläge - cir şarın qolaçlağan altın börket sınına da iä buldı. Büläkne «Azatlıq» radiosınıñ Qazan byurosı citäkçese Rimzil Väliev tapşırdı. İdris Gaziev älege büläk aluğa bik şat buluın äytte. “Älbättä min şatlıqlı xislär kiçeräm, ğorurlıq xisläre dä bar. ğomümän minem öçen kötelmägän xäl buldı, azatlıq radiosınnan maxsus büläk alu. Min iğtibar ittem ul cir şarı östennän oçqan börket sını. Älege börket cir şarın qoçqan kebek, Azatlıq dulqınnarı da cirne qolaçlağan şikelle toyıldı miña. Bu simvolnıñ minem qulğa kilep elägüe, minem öçen zur şatlıq.” Festival' isä ğädättägeçä, konsertta qatnaşqan cırçılar kümäkläşep Tatar cırı gimnın başqaru belän tämamlandı. Gölnaz Şäyxetdin

XS
SM
MD
LG