Accessibility links

шимбә, 3 декабрь 2016, Казан вакыты 03:32

“Time” jurnalı här Tatnetçını da Yıl keşese dip atadı


Bu könnärdä Tatarlar.ru internet säxifäsendä "2006 yıl tatarları" bäygese başlanıp kitte. Anda yılnıñ iñ ataqlı tatar mäğrifätçese, internetçısı, jurnalistı, tatar muzıkantı öçen tawış birergä bula. Yıl tararları bäygesendä kem ciñär, äle bilgel tügel. Ä menä Amerikada çığuçı tanılğan Time jurnalı 2006 yıl keşesen inde sayladı. Jurnal yazğança, bu isemgä här internet qullanuçı layıq. Şul isäptän tatar häm başqort internetçıları da.

“Time” jurnalınıñ dikaberdege soñğı sanı, yıl keşese - sez, digän yazu belän çıqtı. Kem ikänendä şiklänmäs öçen, tışlıqta monitor räseme çıqqan, ä anıñ öçenä kurğaş käğäz yabıştırılğan. Şulay itep, jurnal tışlığına qarap sez üzegezne küräsez. “Time” 2006 yılnıñ keşese – sez dip iglan itep, här internet qullanuçı küz aldında tota. Global komputer çeltärendä närsäder eşlägän, säxifälär yasagan, räsemnär elgän video kameraga töşerep qızıqlı yazmalarnı internettqa cibärgän keşelärgä xörmäten belderä jurnal. Baş möxärrirneñ mäkäläsendä, internetçılar, mäğlümat çaraların kontroldä tota, xättä alarnı uzıp kitte, alar zamança texnoligälär demokratiäsen barlıqqa kiterde, digital telxologilär zamanınñ asılın üzgärtte, dip äytelä. Ul keşelär, bu eşne üz teläkläre belän häm buşlay eşli.

Tatar internet säxilären yasawçı keşelärne dä şul törkemgä kertep bula. Waqıtın qızğanmıyça internetqa xäbärlär cibärüçe, üzlären häm milläten tanıtırğa teläwçe entuziast internetçılarnı da “Time” jurnalı yıl keşeläre itep atıy.

“Yıl tatarı”n saylawnı oyıştırğan internetçılarnı, waqıtın qızğanmyıça käğäz gäzittän mäqälärne internetqa çığarıp, mail törkemen oyıştırgan keşelärne, tatar cırların komputer çeltärenä çığarğan yeğetlär qızlarnı da yıl keşeläre itep atarga bula.

“Time” jurnalı, qullanuçılar qatnaşlığı belän häm uñışlı eşli torğan säxifälärneñ berse itep www.youtube.com kebek dönya buylap tanılğan populär säxifäne atıy. Anda telägän här kem üze töşergän video yazmanı küçerep, anı başqa keşelärgä, yäğni böten dönyağa kürsätä ala. Kemder, uramda, konsertta qızıq äyber kürep foto kamera yäki mobil telefonga anı tiz genä töşerep päräwezğä çığara, kemder internet öçen caylaştırılğan web-kamerı qarşısına quyıp, üzen töşerä.

Video yazmalarnı internetqa cibärergä irenmägän keşelär arasında tatarlar da bar. www.youtube.com saytında tatar dip ezlätsäñ Qazandağı “Üzebez” yäşlär xäräkäte ütkärgän çaradan yazman kilep çığa, Piteburda ütkärgän tatar konsertınnan özeklär, qırım-tatar cırçıları, räsemnäre çığa. “Üzebez” xäräkäte ütkärgän çaradan yazmanı “balaqay” isemle iternet qullanuçı quyğan häm anı dönyanıñ törle poçmaqlarınnan internetqa totaşqan keşelär qaragan, tapşıru äzerlängän mälgä bu yazma 759 tapqır uynatılğan ide. www.youtube.com aşa cırçı “Superalisa” cırın quyğan yäşlär Tatarstannı tanıtırğa tırışqan, anıñ “ber, ike, öç, dürt, tatarstan super good” digän cırı 200 dän dä kübräk tapqır uynatılğan.

Törkiädä yäşäwçe tatarlar üzläre häm başqa tatarlar turında mäğlümatnı tawış.org säxifäse aşa dönyağa tanıta. Zamança texnologiälär bulmasa häm alarnı qullanğan, başqalarğa üzläreneñ mädäniäten göref gädätlären tanıtırğa telägän şuşı keşelär bulmasa, Törkiädäge tatar awılında yäşägän äbine, anıñ niçek bawırsaq peşergändä cırlağanın Qazan, Ufa, Omski tatarları kürä häm işetä alırlar ide mikän. Şuşı yazmanı häm Tatarstan iyärçen kanalı – "Tatarsan yaña ğasır" tapışruın kameraga yazdıp, başqa tatarlar da kürsennär, dip internetqa çığarğan Törkidäge millttäşlärbezne dä yıl keşeläre itep atap bula.

Yıl keşesen saylaw ğädäten kertkän “Time” jurnalı, şulay uq Youtube.com säxifäsen genä tügel, Wikipedia , internet entsiklopediäne dä iñ uñışlı säxifälär rätenä kertä. Wikipediäneñ tatar öleşenä 4 meñgä yaqın mäkälä kertkän keşelärne dä yıl keşelär itep atap bula, yıraq awıllarda utırıp ta säxifälär yasağan millättäşlärebezne dä, İnternetqa närsäder eşlägän härkemne dä “Time” jurnalı 2006 yılnıñ iñ mäşhür keşeläre itep atıy.

Bikä Timerova
XS
SM
MD
LG