Biredä Tönyaq Koreanıñ atom programması turında 6 yaqlı söyläşülärneñ cirattağı öleşe uñışsız tämamlandı. Qıtay räsmie söyläşülärne yabu turında urtaq belderü bulmıyaçaq, barı Qıtay yağı imzalağan belderü genä bulaçaq dide.
Söyläşülär başında Tönyaq Korea üzenä qarşı Quşma Ştatlar quyğan finans çikläwlären alu şartın quyğan ide.
Ämma söyläşülärdäge AQŞ wäkile, däwlät sekretare yardämçese Christopher Hill bu söyläşülärdä barı tik ber mäsäläne, Pxenyannıñ atom programmasın ğına qarawnı täqdim itte.
"Minemçä, alar üzlären şundıy problema itep quyğan mäsälägä, dönyadağı başqa illär belän eş itüdä, finans oyışmaları belän eş itüdä, häm ğömümän bar dönya belän eş itüdä alarğa problemalar tudırğan mäsälägä citdi qararğa tieş" dide Hill.
Söyläşülärneñ qayçan yañartılaçağı tögäl äytelmäsä dä, Hill bez aylar tügel, atnalar turında süz alıp barabız dide. Söyläşülärdä, Tönyaq häm Könyaq Korealar, Rusiä, AQŞ, Qıtay, Yaponiä qatnaşa.
