Accessibility links

шимбә, 3 декабрь 2016, Казан вакыты 22:48

Saparmorat Niyazov ğailä mavzoleyında cirlände


Törkmänstan prezidentı Saparmorat Niyazov, il belän tögäl 21 yıl citäkçelek itkännän soñ 21 dikaber könne 66 yäşendä wafat buldı.

Törkmänstanda 30nçı dikabergä qadär mätäm iğlan itelgän. İlbaşı belän xuşlaşırğa teläwçelär prezident sarayında quyılğan Niyazov cäsäde salınğan tabut yanınnan ütte. Räsmi wäkillär arasında AQŞ Däwlät Sekretare urınbasarı Richard Boucher, Rusiädän premyer-ministr Mixail Fradkov bar ide. Törkmän televideniäsendä alıp baruçı, böten xalıq "böyek yulbaşçısınıñ" ülemenä qayğıra, dip belderde:

"Bezneñ ildä mätäm. Böyek yulbaşçıbız tözetkän, dönyanıñ iñ matur şähärläreneñ berse, ap-aq Aşğabadta – mätäm. Törkmän xalqı häm anıñ bik küp dusları yaratqan yulbaşçılarınıñ ülemenä qayğıra."

Şähärdä östämä iminlek çaraları kürelde, xalıq arasında xärbi kiemnän bulmağan milisiä xezmätkärläre küp bulğan dip xäbär itelä. Azatlıq radiosınıñ Törkmän redaksiäse xäbärçesenä – uramda oçrağan ber keşe:

"Kiçä kiçke 11dän soñ Aşğabadqa kerü yäki çığu mömkin tügel ide. Şähärgä kertkän 4 qapqa da yabıq ide, häm Niyazov cirlängänçe – yabıq bulaçaq dielde. Aşğabadqa terälep torğan Çoğanlı bistäsennän kilüçelär – maşinaların şähär çitendä qaldırıp cäyäw däwam itergä tieş ide.. "

Niyazov Törkmänstan belän üze telägänçä idarä itte, bu idarä – elekke kommunistik ısullar belän anıñ üzeneñ säyer yulları ide, respublikada anıñ şäxes şöxräte nıq üste. Ul üzen ğömerlekkä prezident itep iğlan itte. Oppozisiägä biredä urın yuq ide.

Niyazov belän xuşlaşu yolasına qatnaşqan Ukrain redaksiäse xäbärçese Maksim Drabok, Aşğabad uramnarı bup-buş, keşelär uramğa bik çıqmıy, dip söyläde:

"Yaña Yıl bizäkläre alınğan, çırşılar sütelgän, alämnär yarım töşerelgän. Keşelär başlarına kigän, xattä televideniädä alıp baruçılar da, bu – mätäm totunı añlata. Mätäm 30 dikabergä qadär däwam itäçäk. Däwlät televideniäseneñ 4 kanalında qarağa töşerelgän Niyazov räseme belän aläm, anıñ tormışı turında filmnar häm räsmi delegasiälärneñ qayğı urtaqlaşu çığışları kürsätelä."

Aşğabadta prezident sarayında Niyazov belän xuşlaşudan soñ tabut çäçäklär belän bizälgän xärbi maşinağa quyılıp Niyazovnıñ tuğan şähäre, başqaladan 15 çaqrımdağı Kipçaqqa alıp kitelde.

Möselmança cänazadan soñ Niyazov ğailä mavzoleyına, ätise, änise häm ike ber tuğan abıysı yanına kümelde.

Alğa taba Törkmänstannı ni kötä? Bilgesez.. Niyazov üzenä almaşqa ber kemne dä qaldırmadı.

Yevropa, Rusiä häm AQŞ öçen gaz yatmalarına bay bulğan Törkmnästan – möhim ber partner. Niyazovnı kümü yolasında Rusiäneñ Gazprom monopoliäse başlığı Alexei Miller da qatnaştı...

Quşma Ştatlar Törkmänstannı keşe xoquqları torışı öçen täñqitläp kilä, Niyazov belän xuşlaşırğa kilgän Boucher, Törkmänstan prezidentı wazifaların başqaruçı Gurbanguly Berdy-möxämmädov belän oçraşıp, Waşington, Aşğabad belän yaña çor mönäsäbätlär başlarğa äzer, dip beldergän. İlneñ yuğarı şurası, Xalıq Mäslixäte Şurası 26 dikaber, sişämbe könne cıyılıp yaña prezident saylaw könen iğlan itäçäk, dip kötelä.

Alsu Qormaş
XS
SM
MD
LG