Accessibility links

Кайнар хәбәр

Semberdä Yaña yıl bäyrämnäre başlandı da


Berençese ayıruça üzençälekle buldı – elek “Oktäber” isemen yörtkän kinoteatr binası qarşında Narimanov uramında uzdı ul.

Bäyrämneñ uramda oyıştırıluınıñ mäğnäse dä bar: cimerek xäldäge binanı remontlap, anda Tatar mädäni üzäge buldıru xıyal-niäte belän yäşi tatar cämäğätçelege. Bäyräm isä şuşı binanı xalıqqa tanıtu, yaqınaytu çarası da bulır, dilär Avtonomiä häm Mädäni üzäk citäkçeläre. Tik moña ällä ni ömet bağlamawçılar da yuq tügel. Bina 20 yılğa arendağa birelgän, ä anı remontlau bixisap çığımnar taläp itä, Qazannan da yärdäm sorağannar. Pessimistlar fikerençä, bu binanı tärtipkä kiterü, däwlät yärdäme bulmağaç, 20 yılğa uq suzılır häm remont tämamlanu belän aña xucalar tabılır. Mondıy şöbhä nigezsez dä tügelder: anı ber birgännär ide bit inde. Remont eşläre tämamlanğaç, “Mona Liza” isemle diskotekalar oyıştıruçılar, kemgäder rişwät birep, tartıp alğan ide. Tarix qabatlanmasmı soñ? – digän fiker dä nigezsez tügel kebek ixtimal.

Çırşı bäyrämenä qaytsaq, bu üzençälekle bäyräm yaxşı uzdı, diärgä kiräk. Anda Lenin rayonınıñ 15, 50, 51-nçe mäktäplärendä ana telen törle formalarda üzläşterüçe tatar balaları qatnaştılar. 28-mäktäp direktorı Äsgat' Fäizev isä üz mäktäbeneñ barça tatar balaların da kitergän. Yaña şähärdä bıyıl ğına açılğan Etnomädäni komponentlı 91-mäktäp balaların ana tele uqıtuçısı Zöhrä Xäbibullina alıp kilgän.

Balalarnı bäyräm belän Lenin rayonı başlığı Aleksandr Mel'nikov täbrikläde. Bäyräm programması ğädäti – ällä ni üzençäleklär kürenmäde. Ğädäti bulmağanı – salqınlıqtanmı inde, balalar ayıruça aktiv cırladılar, biedelär, uynadılar.

Qış babay Mäxmüt Xäyrullin häm Qar qızı Gölsinä Şaryukova üz sälätlären kürsätkän barça balalarğa da büläklären yumart öläştelär. Nigezdä, kitaplar häm täm-tomnar. Bäyräm rayon başlığı alıp kilgän feyerverk belän tämamlandı.

Yäkşämbe könne şundıy uq çara Xalıqlar duslığı yortı dip atalğan bina zalında yäşlär öçen oyıştırıldı. İke bäyrämne dä Ubırlı qarçıq rolendä “Tuğan tel” aktivistı Rozaliä Matrosova yarıysı ğına bizäde häm canlandırdı. Şuşı uq ssenariy buyınça 27-dekaberdä Yaña şähärdä bıyıl ğına açılğan 91-mäktäp balaları da bäyräm itäçäk. Bu çaralar Tatar mädäni üzäge direktorı bulıp Rinat Sadıykov bilgelängäç, bu oyışma eşeneñ canlanuın da kürsätä kebek.

XS
SM
MD
LG