Accessibility links

шимбә, 10 декабрь 2016, Казан вакыты 11:53

Sember tatarlarına İske Kulatqı täesire


Tatar cämäğätçelege tanılğan jurnalist Änwär Möxämmäträximewneñ 75 yıllığın bilgeläp ütte. “Ömet” gäzite tulı ber säxifäsen aña bağışlağan. Änwär äfände “Kümäk köç” isemle rayon gäziten 32 yıl buyı citäklägän. “Ömet”neñ täpiläp kitüenä dä ul zur öleş kertte. Härxäldä, ber yıl buyı, diärlek, “Ömet” “Kümäk köç” tipografiäsendä cıyıldı, basmağa äzerlände. Änwär äfände isä, redaktorlıq wazifalarınnan kitkäç tä baytaq waqıt “Ömet”neñ kön'yak rayonnar buyınça xäbärçese bulıp eşläde.

Şul uq İske Kulatqı rayonı yegete Wildan Zimnurov Ölkä Xökümäteneñ eşmäkärlekne üsterü ministrı bulıp bilgelände. Yaña urında berençe adımnarınıñ berse – “Sember” isemle tatar eşmäkärläre berläşmäse eşçänlege belän tanışu buldı. Tatar maltabarları yaña ministrnı üzlären borçığan mäs'älälär belän dä tanıştırdılar. Mäsälän, metall qaldıqların cıyu tiräsendäge añlaşılmağan ğämällär, biznesmennarnıñ xoquqların yaqlaw, bazarlarda tärtip urnaştıru buyınça citdi täqdimnären citkerdelär. Şulay uq ölkä üzägendä çüp-çarnı eşkärtü buyınça maxsus zavod tözü täqdime belän çıqtılar. “Sember” klubı räise Rawil Kuzäxmätev äytüençä, ägär eşne berär tatar yegetenä ışanıp tapşırsalar, hiçşiksez, oyıştıra alır ide. Ä bu ğämäl eş urınnarı buldıru, şähärne paq'landıru yağınnan barçabızğa da fayda kiterer ide. Rawil äfände dä yaña ministrnıñ yaqtaşı – Kulatqı yegete.

Şul uq İske Kulatqıdan tağın ber xäbär. Rayonnıñ İske Atlaş häm İske Mastak awıllarında estrada cırçısı Lena Borhanova üzeneñ icat törkeme belän tamaşalar qıldı. Bu konsertlar - Sarıtawda yäşäwçe Eduard Ğanievneñ üz awıldaşlarına buşlay büläge. Eduard äfände, ğomumän, rayondaşlarına matdi yärdäme belän tanılğan şäxes. Menä berniçä yıl inde ul rayondaşlarınıñ Xac qılu çığımnarın üz östenä ala. Bıyıl da 8 keşene Mäkkägä üz xisabına ozattı. İske Kulatqıda Ufa İslam universitetınıñ filialı açıluğa da ul üz öleşen kertkän, dip işetelde.

Ölkä üzägeneñ 17-nçe kitapxanäsendä uzğan soñğı çara da İske Kulatqığa qağılışlı. Anda şuşı rayonnıñ İske Mastak awılında tuğan şağir Säğit Sönçäläygä bağışlanğan kiçä uzdı. Härxäldä, çaranı parlı cır belän bizägän ike igezäk Şaryukovalar Sönçäläyneñ üz yaqtaşlırı ikänenä basım yasamıyça uzmadılar.

Ayrat İbrahim, Sember

XS
SM
MD
LG