Accessibility links

якшәмбе, 11 декабрь 2016, Казан вакыты 03:11

Tähran BMO rezolütsiäsenä qaramastan uran bayıtunı däwam itäçäk


Iran BMO Iminlek Şurasınıñ çikläwlär kertü belän yanawçı rezolütsiäsenä qaramastan uran bayıtunı däwam itäçägen belderde. Düşämbe könne İran prezidentı Mäxmät Äxmädinicat BMO İminlek Şurası çikläwläre ilneñ atom programmasına täesir itmiäçäk dide.

İran şimbä könne BMO İminlek Şurasındağı barlıq 15 il tarafınnan bertawıştan xuplanğan, Tähranğa atom-töş matdäläre häm texnologiäläre satunı tıyuçı bu rezolütsiäne kire qağıp atom programması täwäkkäl häm tizlek belän alğa baraçaq di.

İran bu programma tulısınça tınıç maqsatta eşli häm Atom Töş Texnologiälären Taratmaw kileşüe äğzası bularaq bezneñ tınıç maqsatlarda uran bayıtu xoquqıbız bar dip täqrarlıy.

Ämma xalıqara cämäğätçelek dönyada iñ küp neft çığaruçı 4-nçe il bulğan İrannıñ atom-töşen qullanu niätlärenä şiklänep qarıy häm anıñ atom programmasın awızlıqlarğa teli.

Düşämbe könne İrannıñ xökümät süzçese Ğöläm Xösäin İlhan BMO rezolütsiäse farazlawlarğa nigezlängän häm farazlar nigezendä ber genä ilneñ dä xoquqın tartıp alırğa yaramıy dide.

Prezident Äxmädinicat isä bu säyäsi rezolütsiä häm ul BMOda AQŞ belän Britaniäneñ yözen saqlap qalunı maqsat itä dide. Yäkşämbe könne ul bu rezolütsiä ber qäğäz kisäge genä digän ide.

Äxmädinicat çikläwlär İrannıñ atom programmasın tuqtata almıyaçaq dip belderde.

"Min sezgä şunı äytäm, sezneñ bu ğämälegez İran öçen zıyansız ğına bulıp qalmıyaçaq, tizdän sez bu buş häm yasalma ğämälegez öçen ğafu da ütenäçäksez" dide Äxmädinicat.

İminlek Şurası BMOnıñ atom emergiä idaräse başlığı Möxämmät äl-Baradaydan 60 kön eçendä İrannıñ uran bayıtunı tuqtatu turındağı şura taläben niçek ütäwen xäbär itüne soradı häm İran ütämägän oçraqta yaña çara kürü belän yanadı.

Ämma İran aña buysınır kebek kürenmi. Atom-töş söyläşülärendä İran yağın citäklägän Ali Laricani Tähran bu rezolütsiägä üzeneñ atom programmasın ğämälgä aşıru belän cawap biräçäk dide. Laricani yäkşämbe könne ül uran bayıtuçı 3 meñ sentrifuga Natanz qorılmasına quyıla başlarğa tieş ide dip belderde.

Düşämbe könne İran Atom Energiä Oyışması räis urınbasarı Möxämmät Säidi sentrifugalar BMO atom energiä idaräse küzätüe astında quyılaçaq dide.

Ul arada İran parlamentı xökümättän BMO atom energiä idaräse belän xezmättäşlekne kimetüne häm küzdän kiçerüne taläp itüçe qarar çığaru belän yanadı.

Tähranda çığuçı Kayhan gazetı baş möxärrire Xösäin Şäriğätmädäri bu rezolütsiä İzrailgä büläk buldı moña cawap itep atom töş texnologiälären taratmaw kileşüennän çığarğa kiräk dide.

Başqalar isä, şul isäptän deputat Xösäin Äfäridä xislärgä birelmäskä kiräk häm İran söyläşülärne däwam itärgä tieş dide.

Elekke reformaçıl deputat İlahi Kulaii Azatlıq radiosına "Şundıy rezolütsiä qabul itelügä qaramastan, häm monı İran belän söyläşülärneñ axırı dip qabul itärgä yaramıy, barlıq cirle, töbäktäge häm xalıqara köçlär yañadan diplomatiägä yul açılsın öçen mömkin bulğança tırışırğa" tieş dide.

Düşämbe könne BMO İminlek Şurasınıñ daimi äğzası, İranda şaqtıy zur iqtisadıy mänfäğätläre bulğan Qıtay Tährannı yaña söyläşülärgä çaqırdı. Qıtay tışqı eşlär ministrlığı süzçese Qıtay rezolütsiä taläpläre ütäler dip ömetlänä dide häm çikläwlär problemağa daimi çişelek bula almıy dip belderde.

Naif Aqmal, Praga.
XS
SM
MD
LG