Accessibility links

сишәмбе, 6 декабрь 2016, Казан вакыты 03:49

Otan: Qazaxstanğa köçle partiä kiräk


Qazaxstandağı Otan firqase oyışuınnan birle, yağni 1999nçı yıldan başlap säyäsi säxnädä iñ zur urın alıp tora. Bıyıl Otanğa, prezident yaqlı tağın berniçä partiä quşıldı, uzğan atnada Astanada ütkän qorıltayda Otan partiäse üzenä tağın ike firqane qabul itte häm öleşçä isemen üzgärtte.

Qazaxstannıñ 15 millionlıq xalqınıñ 500 meñe – Otan firqase äğzaläre. Qorıltayda Otan üz eçenä Azamattıq (yağni Watandaşlar) firqaseneñ 160 meñ äğzasen häm Agrarlıq partiäseneñ 102 meñ äğzasen qabul itte. Azamattıq – Qazaxstandağı ikençe zur partiä ide.

Otan räise uranbasarı wazifaların başqaruşı Bäxetcan Jumagulov, zur plannarı bulğan ilgä zur säyäsi partiä kiräk, dip belderde:

"Dönya täcribäsennän kürengänçä, il aldında zur iqtisadi häm sosial maqsatlar torğanda, köçle firqa genä tärräqiät öçen näticäle strategiä buldıra ala. Yaponiä, Şvesiä, Singapur häm başqa illäre – monıñ misalı."

Däwam itep, Jumagulov, tağın ike partiä quşılğannan soñ, Otan parlamentta küpçelekne alaçaq, dide:

"Bezneñ fraksiä xäzer Mäclestä 90%tı alıp tora, soñğı yıllarda bez qanunçığaru eşeneñ sıyfatın üsterdek."

Berläşü prosessında Otanğa yaña isem birü täqdime dä çıqtı, firqa – Nur-Otan dip üzgärtelde, Otan – qazaxçada Watan digän süz, yağni monnan soñ firqa "Watan Nurı" dip atalaçaq, ämma Jumagulov isemneñ mäğnäsen başqa törle añlattı:

"Bu isem bezneñ partiäneñ – ilküläm partiä bulğanın, anıñ demokratik ideologiäsen, kiläçäkkä yünäleşen häm Nursoltan Nazarbayev citäkçelegendäge il firqase buluın añlata."

Firqaneñ isemen üzgärtügä qarşı çığuçılar da buldı. Qazaxstan prezidentınıñ olı qızı, üzeneñ Asar partiäsen şulay uq Otan belän quşqan Dariğa Nazarbayeva , qarşı tawışlar – yaxşı işarä, dip belderde:

"Barısınıñ da şomğa ğına, aldan bilgelängänçä ütmäwenä min şat, şulay uq partiä säyäsätenä qarşı fiker belderergä teläwçelär bulğanına min söyendem."

Säyäsi säxnägä Nur-Otan kebek zur firqaneñ çığuı – oppozisiädäge partiälärneñ xälen qatlawlandıra. Oppozisiädäge iñ zur partiäneñ dä 100 meñ dä äğzase yuq, şuña kürä Nur-Otan yaqın kiläçäktä äydäwçe säyäsi köç bulır dip farazlana.

Alsu Qormaş
XS
SM
MD
LG