Accessibility links

якшәмбе, 11 декабрь 2016, Казан вакыты 07:21

2006 yılda Novosibirski ölkäse tatarları


2006 yıl Novosibirski tatarları küñelendä törki xalıqlar mädäniäteneñ “Seber çäyxanäse” dip isemlängän 2- nçe regional' festivale belän istälekle bulıp qalır disäk, yalğış bulmas. Bu festival' Ölkä tatar mädäniät üzäge aktivistları köçe belän ütkärelde, xalıq-ara däräcädä buldı häm anda törle töbäklärdän kilgän milli kollektivlar qatnaştı. Törki xalıqlar festival' turında “Azatlıq” tıñlawçıları da xäbärdarlar. Ämma, uzğannarğa yomğaq yasağanda, festival'neñ qayber mizgellären iskä töşerep kitü dä urınlı bulır.

4 kön däwamında barğan festival' qısalarında matbuğat, fän häm mädäniät eşlekleläre belän oçraşular, keramika häm dekorativ qul eşläre kürgäzmäläre, törle konkurslar, tügäräk öställär, matbuğat oçraşuları, törki xalıqlar turında kinofil'mnar kürsätü, milli kollektivlarnıñ çığışları häm başqa küp törle çaralar uzdı. Festival'ne oyıştıru eşlärendä şähärdä eşläwçe başqa millätlär oyışmaları da teläp qatnaştılar. Älbättä oyıştıruçılar, äydäp baruçılar bulmasa, eşneñ uñışlı kilep çığuına ışanıp bulmıy . Ölkä tatar mädäniät üzäge üzeneñ eşçänlege, oyıştıru säläte buluı belän başqalardan ayırılıp tora . “Başqa oyışmalar kümäk eşlärne oyıştırunı üz qullarına alırğa bügenge köndä äzer tügellär,” - di Mödäris Abakirov.

Ölkä tatar mädäniät üzägeneñ eşçänlege 2006 yılda da cirle xakimiät tarafınnan yuğarı bäyälände. Başqarğan eşläre öçen üzäkkä ölkä häm şähär xakimiätläreneñ maqtaw käğäzläre, räxmät xatları häm istälekle büläkläre birelde. Üzäkneñ 2006 yılda başqarğan eşläre Tatarstan tarafınnan da yuğarı bäyälände. Bötendönya tatar kongressınıñ dekaber ayında ütkärgän kiñäytelgän utırışında Rauza xanım Tixomirovağa däräcäle büläk - Qazannıñ meñellığına bağışlanğan medal' birelde.

2006 yılda ölkädä tatar mäğlümat çaralarında da qayber üzgäreşlär buldı. İctimaği räweştä näşer itelä torğan “Azat seber” gazetasınıñ baş möxärrire alışındı. Gazetağa citäkçe bulıp yuğarı belemle belgeç - Mödäris Abakirov kilde. Näticädä, gazeta tösleräk, eçtälekleräk häm tatar telendä yazılğan mäqälälärgä bayıraq bulıp çığa başladı. Döres, gazetanıñ finans problemalar äle xäl itelmägän, anıñ yazmışı haman da iğänäçelär qulında - aqça bulmağanda , äzerlängän basma da näşer itelmi tora.

Qıyınlıqlar ber gazeta näşer itüdä genä tügel. Novosibirskinıñ 21-nçe irekle kanalında çığıp kilgän tatar tapşıruları, şulay uq finans bulmaw säbäple, yıl başınnan tuqtatıldı. Anıñ qabat tergezelüenä ömet yuq däräcädä.

Novosibirskida mäğärif eşläre dä maqtanırlıq tügel. Başqa töbäklärdä kebek, biredä dä tuğan tel mäsäläse çişelmägän.

“Baraba tatarları tuğan tellären onıtıp kilälär, tatar awılları mäktäplärendä tuğan tel uqıtu fakul'tativ räweşkä qalıp bara, yäşlär ana telendä söyläşmilär, tatar aktivistları tırışlığı belän açılğan fakul'tativ däreslärgä yörmilär”, - di, borçılıp, Mödäris Abakirov.

Ul üze tatar mädäniät üzäge qarşında oyıştırılğan fakul'tativta tatar tele uqıta, annan tış fänni eşlär dä alıp bara – tatar tele konsepsiäsen yaza. Bu eştä aña Qazan häm Novosibirski tel belgeçläre yärdäm itä. 2006 yılnı konsepsiä tözü eşläre tämamlandı. Mödäris äfände xäzer anı basıp çığaru xästäre belän mäşgül'. Aldağı yılda konsepsiä basılıp çıqsa, Mödäris äfände anı Qazanda aprel' ayında uzaçaq uqıtuçılar seminarında kiñ cämäğätçelekkä täqdim itärgä niätli.

Ğomum alğanda, menä şundıy uñışlar, eşlär, mäşäqätlär belän bilgelände 2006 yıl Novosibirski ölkäsendä. Aldağı yılda tatarlar tormışında nindi üzgäreşlär bulır, älegä äytüe qıyın. Härxäldä “Azatlıq” tıñlawçıların alar belän tanıştırıp torırbız.

Saniä Mirxaleeva, Omski

XS
SM
MD
LG