Accessibility links

сишәмбе, 6 декабрь 2016, Казан вакыты 15:18

2006 yılda Törkiädäge tatar-başqortlar


26 Martta İstanbulda Tatarstan respublikasınıñ Törkiädäge tulı wäkalätle wäkilçelege tarafınnan İstanbul Mecidiyeköy Mädäniät Üzäge zalında 4-nçe Tatar studentları bäygese uzdırıldı. Tatarstannan kilgän cırçı Ravil Galiev tä qunaqlarğa matur cırların başqardı. April urtasında Razil Väliev, Damir İsxakov, Rifat Fettaxov, Räşit Minxac, İlşat Saetov, häm tağı biş jurnalisttan torğan delegatsiä Törkiägä vizit yasadılar.

Ğabdulla Tuqaynıñ 120 yıllığı uñayı belän 14 Apreldä Ankarada Tuqayğa bağışlanğan ber cıyılış, 19 Apreldä isä säğat 22.40’ta Törek täläviziäseneñ TRT İnt kanalında mäxsus programma buldı. “Türk Dünyası Tarih Kültür Dergisi” jurnalınıñ May sanında Ramilä Yarullinanıñ “Tuqaynıñ şiğriät dönyasında yaratu” digän mäqaläse dönya kürde.

31 Mayda İstanbul Industrie Oyışması belän Tatarstan Säwdä häm Tışqı Ekonomik Xezmättäşlek ministerlege “Tatarstannıñ Ekonomik Potensialın häm Alabuğa İrekle Ekonomik Zonasın tanıtu” cıyılışın ütkärdelär.

İstanbulda 2-3 Yün tarixlarında Tuqaynıñ tuuıınıñ 120 yıllığına bağışlanğan kiçä, artınnan uzdırılğan Sabantuy süzneñ tulı mäğnäse belän bik zur uñış buldı. Mädäniät häm Turizm Ministırı Attila Koçnıñ yolanıñ 2-se häm 3-ndä dä yolalarğa qatnaşuı bu ber Törek Ministrınıñ berençe märtäbä Tatarlarğa şundıy zur ähämiät birüe buldı.

120 keşedän torğan Tatarstan delegatsiäsendä Mädäniät ministrı Zilä Vliävadan tış, Böten Dönya Tatar Kongressı räise Rinat Zakirov, Tatarstan Yazuçılar Berlege citäkçese İlfat İbrahimov, Kazan Utları başredaktorı Ravil Fäyzullin, Tatarstan Kitap Näşriatı citäkçese Damir Şakirov, Kompozitor Almaz Monasıpovlar bar ide.

2 Yün comğa kön Cemal Reşit Rey Konsert zalında oyıştırılğan Tuqay räsemnäre kürgäzmäse Ministrlar Koç, Väliäva häm Böyekilçe Stegny tarafınnan açıldı. Tuqaynıñ Törekçägä tärcemä itelgän saylanılğan mäqalä häm şiğerläre cıyılğan kitaplar taratıldı. Ministr Koç “Min Tatarmın, Tatar öçen can atarmın; Min bit üzem dä çın Tatarmın” digän süzlär belän çığışın betergäç,zalda köçle alqış quptı.

3 Yündä Sabantuy da Ministrlar, Böyekilçe, şağirlär hb.larnıñ qotlaw süzläre buldı. Rinat Zakirov Prof. Nadir Däwlätkä Tatar xalqınıñ milli-mädäni üseşenä kertkän xezmätläre öçen Kongresnıñ medalen birde.

Tatarstan delegatsiäse 4 Yündä aftobus belän 6-7 säğatlek yuldağı Kütahyağa kitte.

Başqortsan Sänğät Könnäre 4 Yün yäkşämbe könne İstanbulda Sultanahmet maydanında ütkärelgän sabantuy belän başlandı. Sabantuyğa Başqorstan Mädäniät häm Milli Säyäsät Ministrı İlişev belän Mädäniät häm Turizm Ministere Koç qatnaştılar. Kiçen isä Fäyzi Ğaskarov isemendäge Başqortstan Däwlät Biyü Ansamble sänğätkärläreneñ gastrole buldı. Düşämbe kön isä Cemal Reşit Rey konsert zalında Başqortstan konsertı buldı.

“Türk Kültürü” jurnalınıñ 517-518-nçe May-Yün sanında Fırat Universitetınnan Dr. Füsun Karanıñ “X-XII ğasır İdel Bulgar Däwläteneñ ekonomik xäle” isemle 13 bittän torğan mäqaläse dönya kürde.

Mirsäit Ämirneñ “Gölşayan” isemle ike pärdälek spektakele 13 Augustta İstanbulda säxnägä quyıldı.

Baytaq qına Törek gazetası sintäber urtasında Däwlät Ministere Kürşad Tüzmenneñ Ufaga yasağan vizitına ähämiät birdelär.

18-20 Sintäberdä Antalyada Törek Qorıltayı ütkärelde. Tatarstannan un tiräsendä keşe çaqırılğan bulsa da öç delegat Damir İsxakov, Färidä Ğaffarova häm Mars Tukaev qına qorıltayğa qatnaştılar. Çuvaşlar ber ike keşedän, Başqortlar isä biş keşedän tordı.

11-12 Noyäberdä Kütahya qalasında Xalıqara İdel-Ural tikşerenüläre simpoziumı ütkärelde. Qızğanıçqa qarşı Kütahya şähäre İstanbul, Ankara kebek mädäni üzäklärdän bik yıraq bulu säbäple simpozium iğtibar cälep itä almadı.

7-8 Dekaberdä İstanbulda ütkärelgän xalıqara Çıngız häm varisları simpoziumına Tatar ğalimnäre iğlan itelgän buluğa qaramastan qatnaşalmadılar.

18-19 Dekaber tarixlarında Ankarada Törek Mädäniäte häm Sänğäte Urtaq Citäkçelege TÜRKSOY-nıñ cıylışına Tatarstannan Premiernıñ urınbasarı häm Mädäniät Ministrı Zilä Väliäva qatnaştı.

Äxtäm İbrahim, İstanbul

XS
SM
MD
LG