Accessibility links

дүшәмбе, 5 декабрь 2016, Казан вакыты 07:32

Täkermändä icat kiçäse


Ğabdelxäy Sabitovnıñ ädäbi icatı tatar uquçılarına tanış ta, tanış ta tügel. 1976 yıldan SSSR yazuçılar berlege äğzası bulğan Ğabdelxäy Sabitov sigez kitap yazarğa ölgerde. Ul az yazsa da, özderep yaza ide, äsärläre çın mäğnäsendä yuğarı däräcädä buldı. Yazuçınıñ 75 yıllığına bağışlanğan kiçädä menä şundıy fikerlär äytelde. Älege kiçä şimbä könne, Ğabdelxäy Sabitovnıñ tuğan yağı, Minzälä rayonı Yuğarı Täkermän awılında ütte. Çaqırılğan qunaqlar arasında yazuçı häm şağirlär Gäräy Räxim, Älfät Zakircanov, "Yalqın" jurnalı baş möxärrire El'mira Zakirova qatnaşındağı Qazan delegatsiäse dä bar ide. 1931 yılda Täkermän awılında tuıp-üskän, 1995 yılda yaqtı dönyadan kitep barğan Ğabdelxäy Sabitov şaqtıy yıllar Yalqın jurnalında da eşli. Märhüm icatınıñ şuşı yılların iskä alıp, El'mira Zakirova, Gäräy Räxim Ğabdelxäy abıynıñ küplärgä icadi yul kürsätüen, tatar teleneñ tılsımın belüen iskä töşerdelär. Çallıdan kilgän yazuçı, şağir Räşit Bäşärneñ çığışında mondıy süzlär buldı:

-Qaytsın ide Ğabdelxäy Sabitov bezneñ yanğa, ädäbi äsärne niçek yazarğa ikänen kürsätsen ide. Anıñ tel saflığına älegä qädär ğacäplänäm, yuğarı bäya biräm. Bügenge naçar tel uquçı sanın kimetügä, beterügä kiteräçäk. Ädäbiättağı, şigriättäğe tel baylığı-könüzäk problemağa äylände, dide Räşit Bäşär. Älege fikerne Ğabdelxäy Sabitovnıñ xatını Fätxiä apa da xuplap, "anıñ yazu ostalığın öyränü zıyan itmäs ide",-digän süzlären citkerde. Älege kiçä Yuğarı Täkermän awılı mäktäbendä, uquçılar qatnaşında ütte. Bügenge köndä 80 yaqın bala uqığan bu mäktäpkä Ğabdelxäy Sabitov iseme birelgän. Menä ikençe yıl inde 1 sentyab'rne Sabitov däresläre belän başlap cibärälär ikän. Kiçädän soñ uqıtuçılarnıñ, awıl xalqınıñ berqädär borçuı barlığın beldem. Mäskäw alıp barğan optimal'läşterü säyäsäte Ğabdelxäy Sabitov isemendäge, Täkermän awılı mäktäbenä dä tiskäre yoğıntı yasarğa mömkin, dilär. Yäğni, mäktäp yabılıp, uquçılarnıñ kürşedäge Xucämät awılına yörep uqu ixtimalı bar. Şulay bula qalğanda, mäktäpne beterü-awılnı beterü belän ber, didelär Täkermänlelär Azatlıq xäbärçesenä. Çınnan da, älege awıldan rayon üzäklärenä, zurraq awıllarğa, şähärlärgä küçep kitüçe ğailälär sanı soñğı waqıtta artqan.

Çallı, Ğafiulla Ğaziz

XS
SM
MD
LG