Accessibility links

шимбә, 10 декабрь 2016, Казан вакыты 17:48

Mari El qartına qarar çığarıldı


İdelbuye häm Uralda tanılğan ideolog, marilar dine belgeçe Vitaliy Tanakov marilarnıñ dine, anıñ nigezläre häm kiläçägenä bağışlanğan kitapçıq çığarğan ide. Bu kitapta din belgeçe marilar dineneñ üseşen başqa dinnär belän çağıştırıp kürsätte. Mari El prokuraturası isä Tanakov marilar milläten başqalardan östen quya diep, cinayät eşe quzğattı. Mari qartı millätara häm din ara nizağlar çığaruda ğayılände.

Lingvistik ekspertiza öçen Vitalıy Tanakovnıñ kitabı Qazan däwlät universitetına cibärelgän inde. Qazan ğalimnäre isä älege basma çınlap ta milli wä dini nizağlar çığara digän näticä çığardı. Ekspertlarnıñ kübese tatarlar ide. 22 dekaber' könne Tanakov eşe buyınça mäxkämä utırışı bulıp ütte. Älege utırış Qazan universitetında ütkän ekspertizağa nigezlänep alıp barıldı. Utırışqa qayber Qazan ğalimnäre kilmäde dä. Yoşkar Ola prokurorınıñ urınbasarı din belgeçen ike yılğa irektän mäxrüm itärgä soradı. Ämma wäzğıät kinät kenä üzgärde. Eş şunda, advokatlar Nijgarda bäysez ekspertiza uzdırdılar. Tübän Novgorod universitetında ütkän tikşerülär buyınça - Mari El qartı Vitaliy Tanakovnıñ kitabında bernindi dä milli wä dini ızğışlar çığaruçı fikerlär yuq. Tübän Novgorod universitetı ekspertları arasında urıslar, yähüdlär başqa millät wäkilläre dä bulğan.

Düşämbe könne Yoşkar-Ola şähäre mäxkämäse Vitaliy Tanakov eşe buyınça qarar çığardı. Älege qarar buyınça, mari qartı 15 täwlek däwamında ictimaği urınnarda eşlärgä tieş bulaçaq. Bu caza aña milli häm konfessiä ara nizağlar çığaru öçen birelde. Şulay itep, xökemdar üze mari qartınıñ kitabında millätara häm din ara ızğışlarğa kiterüçe fikerlär yuq disä dä, Tanakovnı cazasız qaldırmadı.

Al'bina Zäynulla

XS
SM
MD
LG