Accessibility links

сишәмбе, 6 декабрь 2016, Казан вакыты 11:17

Teatrlar tarixına bağışlanğan kürgäzmä açıldı


Ädäbiät häm sänğät yılı tämamlanıp kilgändä, sişämbe könne Qazan teatr tarixına bağışlan “Tılsımlı teatr” dip atalğan kürgäzmä açıldı. Bilgele bulğança, Qazanda G.Qamal isemendäge Tatar akademiä teatrı, K.Tinçurin isemendäge drama häm komediä teatrı, V.Kaçalov isemendäge rus drama teatrı, rus häm tatar Yäş tamaşaçı teatrları häm başqa teatrlar eşläp kilä. Teatr şähäre bulğan Tatarstan başqalasında däwlät däräcäsenä iä bulırlıq teatr muzeyı bulmağanlıqtan, älege kürgäzmä bik tä möhim.

Älege yaña kürgäzmäne Tatarstan milli muzeyı Qazan teatrları belän berlektä oyıştırdı. Anda rus häm tatar, muzıykal' häm drama teatrlarınıñ tarixın çağıldırğan tarixi-dokumental' materiallar, 40 qa yaqın säxnä kostyumnarı, säxnä qorılmaları, iğlan käğäzläre, p'yessa tekstları, fotografiälär urın alğan. Bay ekspozitsiäneñ nigezen Tatarstan Milli muzey fondı, G.Qamal isemendäge teatrı, V.Kaçalov isemendäge drama teatrı, M.Cälil isemendäge Tatar däwlät opera häm balet teatrı, K.Tinçurin isemendäge drama häm komediä teatrı, rus häm tatar yäş tamaşaçılar teatrları, “Äkiät” qurçaq teatrı fondları täşkil itä. Älege “Tılsımlı teatr” kürgäzmäseneñ üzençälege turında milli muzeynıñ ädäbi bülegeneñ fänni xezmätkäre Flera Däminova Azatlıq radiosına menä närsälär äytte. “Bu kürgäzmä tatar teatrınıñ 100 yıllığına, rus teatrınıñ 250 yıllığına, şulay uq Kaçalov teatrına 215 yıl tulu uñayınnan oyıştırıldı. Üzençälegenä kilgändä, biredä Qazandağı barlıq teatrlarnıñ tarixı turında kürgäzmä bulğanı yuq ide, mondıy ruxta bu berençe kürgäzmä. Biredä RSFSRnıñ xalıq artistı, 1920 yıllarda Kaçalov teatrı säxnäsendä uynawçı V.İ.Oqunewanıñ tuqımadan tegelgän külmäge, 1938-48 yıllar opera teatrı solistkası Sara Sadıykovanıñ konsert külmäge, K.Tinçurin teatrında uynalğan spektakl' kostyumnarı quyıla. Milli muzey fondında saqlanğan İl'yas Kudaşev-Aşkazarskiy, Säxibcamal Ğizätullina–Voljskaya, Fatima İl'skaya, Gabdulla Kariev, Xälil Äbcälilevneñ şäxsi äyberläre täqdim itelgän. Şulay uq bu kürgäzmäne oyıştırğanda, bez inde şunı da küzdä totqan idek, monda bezneñ keçkenä genä säxnädä spektakl'lärdän özeklär, törle teatr artistların çaqırıp, alar belän oçraşular ütkärü küzdä totıla.

Şunı da äytergä kiräk, tamaşaçılarnı kürgäzmädä ayıruça elektron taqtada täqdim itelgän materiallar qızıqsınu uyattı. Texnik mömkinleklärne qullanu näticäsendä, monda barlıq şähär teatrlarınıñ spektakl'lären häm fotografiälären kürep bula. Şulay itep, Ädäbiät häm sänğät yılında iñ soñğı mädäni çaralarnıñ berse bulıp, älege teatrlar tarixına bağışlanğan kürgäzmä açıluı buldı. Gölnaz Şäyxetdin

XS
SM
MD
LG