Accessibility links

җомга, 9 декабрь 2016, Казан вакыты 22:31

“Ğädel Rusiä” firqäse ike başlı buldı


Şuşı könnärdä, «Ğädel Rusiä» firqäseneñ üzäk şurası töbäk konferensiäse uzdı. Bu çarada 43 delegat qatnaştı. Utırışta Mäskäwdäge “Ğädel Rusiä” firqäseneñ wäkile bularaq, şuranıñ töbäk säyäsät komitetı räise Räfqat Altınbaev ta bar ide. Konferensiä näticäsendä Tatarstanda älege firqäneñ tağın ber bülege açıldı. Räis itep, moña qädär Rusiäneñ jizn' tormış firqäseneñ Tatarstan bülegen citäklägän, Boris Naymuşin, anıñ urınbasarı Rinat Xabibulaev, şura särkätibe itep Niqolay Spirçagov saylandı.

İskä töşerep ütik, “Ğädel Rusiä” firqäseneñ Tatarstandağı berençe töbäk bülek, monnan ber ay elek Yar Çallı şähärendä uzğan konferensiädä oyışqan ide. Biredä “Watan” häm Rusiäneñ jizn' firqälärennän 50 wäkil qatnaştı. Älege utırışta “Ğädel Rusiä” firqäse prezidiumınıñ, “Watan” häm jizn' firqäsenä berläşergä digän täqdimenä küplär qarşı çıqtı. Çönki berläşkän oçraqta, töbäk büleklärendä östenlek Rusiäneñ Jizn' firqäse äğzalarına birelergä tieş. Alar prezidiumnıñ 70% täşkil itäçäk ide.

Berençe konferensiä waqıtında cirle bülek citäkçese itep Rusiäneñ Jizn' firqäse wäkile Färit Xucixanov, anıñ urınbasarı itep “Watan” firqäsennän Eduard Jijimov saylanğan ide. Konferensiä barışında delegatlar, Räfqat Altınbaev “üz mänfäğätlären qayğırta digän fikerne kütärep, “Ğädel Rusiä” citäkçelären obyektiv häm demokratik bulırğa çaqırdılar. Älege möräcäğätne säbäp itep, 23 dekaberdä uzğan konferensiädä “Ğädel Rusiä” citäkçeläre Tatarstan töbäk firqäsendä eşlärne cayğa salu maqsatınnan, Färit Xücixanov, Eduard Jijimov häm cirle bülek şurasınıñ başqa äğzaların firqädän çığaru turında qarar qabul ittelär. Mäskäwdäge “Ğädel Rusiä”neñ şura räise Spirçagov äfände beldergänçä, töbäk bülegeneñ yaña apparatına saylanu öçen barlıq kandidatlar da üzäk şura tarafınnan täqdim itelgän.

Färit Xucixanov häm Eduard Jijimov isä älege qarar belän riza tügel. Kommersant gäciteneñ 26 dekaber sanında yazılğança, alar Tatarstannıñ federal' terkäw xezmätenä, şimbä könne uzğan konferensiä näticälären inqär itep, şikäyät beldergän. Monnan tış töbäk bülege, üz xoquqların yaqlap mäxkämägä dä möräcäğät itäçäk.

Şulay itep, “Ğädel Rusiä” firqäse ike başlı buldı häm anıñ soñğı başın Mäskäw bilgeläde.

Gadel Galämetdinov

XS
SM
MD
LG