Accessibility links

шимбә, 3 декабрь 2016, Казан вакыты 20:45

Citäkçelär kiläse yılğa ömetlär bağlıy


Başqortstanda bu könnärdä barlıq säyäsi waqiğalar da, sotsial'-könküreş häm mädäni çaralar da Yaña yılnı qarşılawğa bäyle. Atnakiç könne respublika Prezidentı Mortaza Räximov Çiläbe ölkäsenä çiktäş bulğan Uçalı rayonı yaqlarında bulıp, andağı qayber şirkätlär eşçänlekläre belän tanıştı häm yaña yıl bäyrämenä turı kiterep tözelep betkän yaña binalarnı açu tantanalarında qatnaştı. Anıñ süzlärençä, respublika eşli häm çäçäk ata.

Atnakiç könne qayber başqa citäkçelär dä, deputatlar da başqa rayonnarğa häm şähärlärgä eş säfärenä çıqtı. Alarnıñ baruı da bäyräm uñayınnan yaña ob'yektlarnı faydalanuğa tapşıru tantanalarında qatnaşu ide.

Başqortstan öçen alda torğan yıl istälekle bulaçaq. Töbäk citäkçeläre äle ütep barğan yıl däwamında da täqrarlap kilüençä, Başqortstannıñ Rus däwlätenä quşıluına 450 yıl tulu bäyräm iteläçäk kiläse yılda. Bu bäyrämgä respublikanıñ törle dairälärendä qaraş törleçäräk bulsa da, anı ğadi xalıq, ğomumän alğanda, tınıç qabul itä kebek. Ni öçen digändä, şuşı yubiley uñayınnan, Ufada bik küp tözeleşlär alıp barıla. Häm bu xäl başqalanıñ yözen bik nıq üzgärtäçäk, maturlayaçaq. Ä kemneñ inde küp uñaylıqlar tudırılğan matur şähärdä yäşise kilmäsen.

Kiläse yılğa respublika citäkçeläre tağın ber ömet belän kerä – Rusiä belän Başqortstan arasında wäqälätlärne üzara büleşü turında yaña Kileşü tözü ömete ul. Bu ömetneñ äle özelmäwe xaqında çärşämbe könne Başqortstan Däwlät Cıyılışı-Qorıltay räise Konstantin Tolkaçev ta jurnalistlar belän matbuğat oçraşuında belderde. “Bez äle yaña Kileşüneñ ölgese östendä dä eşne däwam itäbez häm anı qabul itü kiräklegenä inandıru öçen, Rusiä Prezidentı Xakimiäte wäkilläre belän söyläşülär dä alıp barabız”, - dide parlament räise. Şul uq waqıtta ul Tatarstan äzerlägän Kileşüneñ yazmışın da küzätäçäklären äytte.

Parlamentnıñ komitet räise Zöfär Yenikeev ta kiläse yılda Başqortstan belän Rusiä arasında yaña Kileşü tözelüe mäslixät bulır ide dip belderde. “Bu Kileşüne imzalaw 450 yıllıq yubileyğa da zur büläk bulır ide”, - di ul.



Zöfär Yenikeev Mäskäw Kremleneñ gel genä reformalar ütkärep toruına häm alarnı töbäklärgä köçläp tağuına da qänäğätsezlegen belderä. “Cirle üzidarä xakimiätlärenä qağılışlı reformanı da bezgä köçläp kertälär”, - di ul.

Başqortstan Däwlät Cıyılışı-Qorıltaynıñ daimi komitetı räise Zöfär Yenikeev süzlärençä, Başqortstan deputatları Rusiä belän Başqortstan arasında yaña Kileşüne tözü öçen bar tırışlığın salaçaq. “Tatarstan belän şundıy Kileşü imzalansa, bezneñ öçen dä zur etärgeç bulaçaq, - di ul. – Läkin, ägär Mäskäw Tatarstan belän dä anı imzalawdan baş tartsa, bezgä dä üzençä ber kisätü bula inde bu”.

XS
SM
MD
LG