Bügen Rusiäneñ qayber gazetalarında häm elektron mäğlümat çaralarında Başqortstandağı Üzäk diniä näzaratı räise, möfti Tälğät Tacetdin belän äñgämälär dönya kürde. Mäğlüm buluınça, Tälğat xäzrät şuşı könnärdä genä berniçä töbäkneñ möselman dini citäkçeläre oçraşuında qatnaşıp qayttı. Şul oçraşuda, Tälğät Tacetdin äytüençä, Rusiä möselmannarnıñ Ufadağı Üzäk Diniä näzaratı, Rusiäneñ Möftilär şurası häm Tön'yak Kavkaz möftiäte citäkçeläre berläşü turında kileşkän. Xäzer inde bu eşne täğäyenläşterü buyınça tağın da söyläşülär kötelä ikän.
“Älege öç möselman oyışması citäkçeläre bu ğämäl xaqında elektän dä uylana ide, - di Tälğät xäzrät. – Çönki elektän berdäm eşlägän dini oyışmalarnıñ bülgälänüe faydağa bulmadı. Xäzer inde bez monı añlawğa kilep cittek. Rusiädäge ğädäti islam ğasırlar buyına tatulıqqa häm berdämlekkä öndägän. Ä soñğı yıllarda, şaytan qotırtuı belän, Rusiä töbäklärenä çit taraflardan bezgä yat bulğan dini ağımnarnı, dini täğlimätlarnı kertergä tırışuçılar tabıldı. Mondıy xäl, älbättä inde, ğadi din totuçılarıbız arasında da uñğa-sulğa awışuçılarnı arttıra ala ide. Ämma bezdä wahhabçılıq ta, başqa tiskäre yünäleşlär dä tamır cäya almadı”.
Tälğat xäzrät ildäge möselman oyışmaların berläşterü ideyäseneñ din ähelläre arasında ğına yaralmawın, ä Mäskäw Kremle taraflarınnan çıqqanlığına da işarä yasadı.
-Bezne – Rusiäneñ möselman oyışmaları citäkçelären Mäsäküdä küptän tügel ilebez Prezidentı Putinnıñ idäräse başlığı Sobyänin cıyıp aldı kiñäşmägä. Menä şunda Tön'yak Kavkaz möftiäte citäkçeläre dä kilgän ide. Ul oçraşuda bez berläşergä kiräk, digän urtaq fikergä kildek, - di T. Tacetdin.
Tälğät Tacetdin äytüençä, Tön'yak Kavkaz möselmannarı Kileşterü şurası da, Rusiä Möftilär Şurası da Ufadağı Üzäk diniä näzaratı belän urtaq eşläsä, bik döres bulaçaq. Möfti xäzrät äytüençä, bu berläşü xaqındağı aldağı söyläşü ğinwar azaqlarında uq Qazanda ütärgä mömkin.
Şul uq waqıtta Başqortstandağı din ähelläre dairäsendä Tälğät Tacetdin Ufadağı Üzäk diniä näzaratın Qazanğa küçerergä cıyına ikän, digän imeş-mimeşlär dä taralıp ölgerde. Ämma şuşı xaqta jurnalistlarnıñ sorawlarına Tälğät xäzrät tiskäre cawap birde. “Bez Qazanğa küçmibez, ä barı tik minem Qazanda da eş urınım ğına bulaçaq”, - dide ul. Şulay uq Mäskäwdä dä, Maxaçqala da üzeneñ xezmät urınnarı bulaçağın iskärtte Tälğät Tacetdin.
