Accessibility links

шимбә, 3 декабрь 2016, Казан вакыты 20:54

Başqortstan tatarları Qazanda kiñäşmädä qatnaştı


Bötendönya Tatar kongressı Başqarma komitetı äğzası, Başqortstan Tatar milli-mädäni moxtariäte räise Ramil Bignov citäkçelegendäge wäkillek Qazanda eş säfärendä bulıp qayttı. Anda Başqortstan tatar milli oyışmaları wäkilläre Bötendönya Tatar kongressı Başqarma komitetı utırışında qatnaştı.

Ramil äfände äytüençä, Bötendönya Tatar kongressı Başqarma komitetı utırışındağı söyläşülär eşlekle şartlarda ütkän. Ramil Bignov üze, BTK Başqarma komitetınıñ iqtisadıy mäs'älälär häm eşquarlıqnı yaqlaw komissiäse äğzası bularaq, anıñ utırışında üzeneñ qayber täqdimnäre häm teläkläre belän dä çığış yasağan.

Ramil Bignov BTK Başqarma komitetınıñ eşçänlegenä, ğomumän alğanda, uñay bäya birde. “Bötendönya tatar kongressı uzğan ber yıl eçendä baytaq qına eşlär başqardı häm başqara. Törle töbäklärgä barıp küçmä utırışlar ütkärü dä üz näticäsen birä, - dide R. Bignov. – Ämma Başqortstan tatarları häm alarnıñ milli oyışmaları respublikadağı üzençälekle şartlarda eşli häm şuña da alarğa ayırım ber mönäsäbät häm yärdäm kiräk. Başqortstanda tatarlarnıñ xoquqları qısılu berkemgä dä ser tügel. Bu xaqta bez äledän-äle çañ qağıp torabız. Ämma işetüçe häm uñay üzgäreşlärgä äzer toruçılar ğına kürenmi. Alay ğına da tügel, törle säbäplär belän Bötendönya Tatar kongressınıñ ber bülege bulğan Başqortstan Tatar kongressın yabıp quyu omtılışları bara”.

Ramil Bignov süzlärençä, Qazandağı fiker alışular ezsez qalmasqa tieş. “BTK kiñäşmäsendä Başqortstan tatarları problemalarına da iğtibar yünältelde, - di ul. - Bezgä Başqortstan Tatar kongressın da, Başqortstan tatar milli-mädäni moxtariäten dä saqlap qalırğa ğına tügel, ä alarnıñ eşçänlegen tağın da näticäleräk itärgä kiräk”.

Fänis Fätxi, Ufa

XS
SM
MD
LG