Comğa könne Minzälä xalqı şähärneñ 225 yıllığın uzdırdı. Şuşı uq könne Minzälä Tatar däylät drama teatrı üzeneñ 70 yıllığın bäyräm itte. Drama teatrındağı tantanada Premyer-ministrı urınbasarı - mädäniät ministrı Zilä Wäliewa, Däwlät Şurası räise urınbasarı Rimma Ratnikova, Minzälä xakimiäte başlığı Giorgiy Kupriänov häm başqa küpsanlı qunaqlar qatnaştı. Däwlät isemennän Zilä Wälieva teatrğa "KAMAZ" maşinasın häm PAZ avtobusın büläk itte. Xakimiät başlığı Giorgiy Kupriänov isä teatrğa ike bülmäle fatirdan açqıçlar tapşırdı.
Minzälä şähäre häm rayonı xalqı comğa könne Minzäläneñ 225 yıllığın bilgeläp ütte. Bäyräm 225 yıllıq uñayınnan oyıştırılsa da, Minzälä toraq urını bularaq bik borınğıdan bilgele. Şähär başlığı G.Kuprianov yubiley aldınnan "Mäydan" jurnalında mondıy fikerlär äytä:
- Bügen şähär muzeyındağı eksponatlarğa qarap fiker yörtsäk, Minzälä cirendä monnan yöz meñ yıllar elek keşelär yäşägän. Ä menä arxiv dokumentları buyınça tarixı Qazan xanlığı çorınnan ğına açıqlana başlıy."
İnde, şähärneñ isemenä kilgändä, ul borınğı "Mänzäl" digän ğäräp süzennän yasalğan, tuqtap yal itü urını mäğnäsen añlata. Şulay da, qayberäwlär, şul isäptän rayon citäkçese Kuprianov ta Minzälä qalasınıñ şuşı ğäräp süze belän bäyle buluına bik ışanıp citmi. Qala başlığı bolay di:
- Şäxsi min üzem ğäräp atamasınıñ Minzälägä beregep qaluına berqädär şiklänsäm dä, mäğnäsenä rizasızlıq beldermim.
Şunısın da iskä töşerik, Minzälä töbäge 16-17 ğasırlarda Ufa provinsiäse, 1774- yıldan Orenbur guberniäse qaramağında bula. 1861 yılda Ufa guberniäse tözelgäç, qabat ut kürşelär sostavına kerä. Näq menä şuşı yıllarda bügenge Minzälä rayonı awılları zur üzgäreş kiçerälär. Tawbarın, Käcä, Urtamaq, Küzle Quaq, Tuzğanabikä häm başqa küp tatar awıllarınıñ xalqı yort -cirlärennän quıp cibärelep, alarnıñ öylärenä Tambov, Penza häm Smolensk guberniälärennän urıs krest'yannarın küçerep utırtalar. Näticädä Nikolaevka, Matveevka, Troitsk isemle awıllar barlıqqa kilä. Bügenge Minzälä xalqı Sovetlar Soyuzı Geroe, ikençe bötendönya suğışında armiä, front komandayuşçie general-polkovnik Vasiliy Gordov belän ğorurlana. Stalinğa baş birmägän general Gordov 1951нче yılda atıp üterelä. Minzälä yağı ädip häm şağirläre belän dä tanıldı. Räşit Gäräy, Fännür Safin, Salisä Gäräyeva, F.Battal h.b biredä tuıp üskännär. Minzälädä yäşäwçe şağir A.Märdänov süzläre:
"Bäyrämgä äzerlek eşlärenä TR premyerı R.Miñnexanov citäkçelek itte. Bu- Minzäläneñ 225 yıllıq yubileyё tarixi ähämiätkä iä, digän süz. Minzälädä häm awıllarda moñarçı kürelmägän tözeleş buldı."
Zamanında Minzälädän Tübän Qamadağı ximiä, Çallıdağı KamAZ tözeleşenä distä, meñlägän keşe kitkän. Bäyrämgä diep alarnıñ da ber öleşe tuğan yaqlarına qaytqan häm Minzäläneñ maturlanuına, yañaruına soqlanuların yäşermilär. Yubiley aldınnan danlıqlı Minzälä törmäse dä berqädär yañarğan.
Çallı, Ğafiulla Ğaziz
