Accessibility links

Кайнар хәбәр

Başqortstanda Tatar kongressı wäkile eşläyäçäk


Başqortstanda xäzer Bötendönya Tatar kongressınıñ ayırım ber wäkile eşläyäçäk. Respublikadağı tatar milli oyışmalarına bu şatlıqlı xäbärne äle genä Qazannan eş säfärennän qaytqan Bötendönya Tatar kongressı Başqarma komitetı äğzası, Başqortstan Tatar milli-mädäni moxtariäte räise Ramil Bignov citkerde. Bötendönya Tatar Kongressınıñ Başqortstandağı daimi wäkileneñ iseme dä mäğlüm inde. Ul tatar milli xäräkätendä ozaq yıllar xezmät itüçe tanılğan kompozitor häm cämäğät eşleklese Alik Lokmanov.

Bötendönya Tatar kongressınıñ Başqortstandağı wäkilen täğäyenläwgä äzerlek citdi barğan. Bu urınğa xätta konkurs iğlan itkän bulğannar. Axır çiktä dürt däğwäçı arasınnan Alik Lokmanov saylap alınğan. Näq menä ul Bötendönya Tatar kongressı citäkçelären ışandıra alırlıq eş planın täqdim itkän. Başqortstandağı tatarlarnıñ milli-mädäni mänfägat'lären tulıraq qänäğätländerü yünäleşendä anıñ üz uy-niätläre bar. Moñarçı da şuşı mäsälälärne xäl itügä zur öleşen kertä ide ul. Alik äfände Başqortstan Tatar milli-mädäni moxtariäteneñ mädäniät mäsäläläre öçen cawaplı bülekneñ citäkçese. Bıyıl Başqortstanda baytaq qına mädäni çaralarnı oyıştıruda näq menä ul başlap yörde. “Barlıq eşlär dä ütälep betmäsä dä, küñel bulırlıq zur çaralar oyıştırıldı”, - di Alik Lokmanov.

Ufadağı tatar milli xäräkäte wäkilläreneñ berse Alik Lokmanov buldı. Bu atnada ul Bötendönya Tatar kongressınıñ Başqortstandağı daimi wäkile wazifasına saylandı. Bu wazifada Alik äfände xezmät xaqı alıp eşläyäçäk. Monısı da bik möhimder, çönki moña qädär Başqortstan tatar kongressı Başqarma komitetı äğzaları cämäğät başlanğıçında ğına eşli ide.

XS
SM
MD
LG