Accessibility links

якшәмбе, 11 декабрь 2016, Казан вакыты 01:34

Törkmänstan Rusiä matbuğatındağı qayber yazmalarğa rizasızlı belderä


Törkmänstan tışqı eşlär ministrlığı Rusiä matbuğatın Törkmän häm anda prezident Saparmurat Niyazovnıñ ülemennän soñ xakimiät almaşı turında yalğan mäğlümätlär taratuda ğäyepli. Törkmän tışqı eşlär ministrı Räşit Meredov uzğan kiçtä televidenie aşa Rusiädäge qayber kiñküläm mäğlümät çaralarınıñ Törkmänstannı yaqtırtuın tänqitläde. "Rusiäneñ kiñküläm mäğlümät çaralarında yänäse törkmänstanda tüntäreleş bulğan, xakimiät qanunsı räweştä küçä digän yala yağular häm qayber politolog dip ataluçılarnıñ mäqäläläre barlıqqa kilde. Bolar barısı da dönya cämäğätçelegendä Törkmänstandağı çın xällär turında yalğış täesir qaldırunı maqsat itä. Bu säbäptän, Törkmänstan tışqı eşlär ministrlığı ul xäbärlär çınbarlıqqa hiç tä turı kilmi dip belderergä wäkalätle" dide Meredov. Kiçä bu mäsäläne Törkmänstannıñ Rusiädäge ilçese Xalnazar Agaxanov ta Rusiä tışqı eşlär ministrı urınbasarı Grigoriy Karasin belän söyläşüdä kütärde. Karasin andıy mäqälälär Rusiä citäkçelegeneñ räsmi qaraşın çağıldırmıy, barı ayırım xäbärçelärneñ fikerlären genä çağıldıra dide.

XS
SM
MD
LG