Accessibility links

чәршәмбе, 7 декабрь 2016, Казан вакыты 21:39

Qazanda yaña yılda bala tuu artuı sizelmi


Bilgele bulğança, şuşı yılnıñ berençe ğinwarınnan Rusiädä "ana kapital"lı turındağı qanun köçkä kerde. Xäzer ikençe yäki öçençe bäbien tapqan änilärgä 250 meñ sumğa sertifikatlar tapşırılaçaq. Şuşı uñaydan beräwlär bala tuunı ğinwargä kiçekterergä tırışsa, ikençelär irtäräk tuğan balanı terkämiçä, 2007 yılnıñ citüen kötte.

Qazanda isä aqça dip tabiği protsessnı bozu oçraqları küzätelmägän. Ğinwar başında bala tuu sanınıñ artuı da bik sizelmi, di belgeçlär. Mäsälän, 4нче bala tudıru yortında berençe ğinwar könne 8 sabıy dönyağa kilgän. Häm anda kön sayın 7-8 bala tuıp tora.

Qazanda “ana kapitalı”na iä bulaçaq berençe sabıy isä şähärneñ berençe bala tudıru yortında dönyağa kilgän. Malay yaña yıl tönendä 12 säğät 40 minutta tuğan. 24 yäşlek ananıñ bu inde ikençe balası, şuña da Putin wäğdä itkän aqçağa anıñ tulı xoquqı bar. Tik ul işelep töşkän baylıqqa älegä däğwä itä almıy. Xäzergä barı tik bala tuu turındağı tanıqlıqnı totıp, Pensiä fondına ğariza yazaçaq häm sertifikat alaçaq. Sertifikatlar isä 2010 yıldan ğına “eşli başlıy”. Pensiä fondına şulay uq aqçanıñ niçegräk faydalanuı turında da dokument tutırırğa häm kileşü tözergä kiräk bulaçaq. Ägär toraq şartlarıñnı yaxşırtırğa uylıysıñ ikän, mäsälän, ipoteka buyınça, bank, pensiä fondı, tözeleş oyışması häm sezneñ arada kileşü tözelä. Qısqası, bala tabıp bayırğa uylawçılarğa ber dä qulay tügel bu qanun. Citmäsä, balanı 3 yäşkä qädär isän-saw üsterergä dä kiräk bit äle. Qanunda tağın şundıy yullar da bar - ägär ana faciğäle töstä wafat bulsa, “ana kapitalı“na xoquq atağa küçerelä. Ullıqqa, qızlıqqa bala aluçılar öçen dä bu şulay.

Hawadağı tornağa oşağan bulsa da, Yuri Lewada isemendäge cämäğätçelek fikeren tikşerenülär üzäge “ana kapitalı”n yılnıñ iñ zur waqiğası dip atadı. Ämma soraştıruçılarnıñ 85 protsentı aña şik belderä ikän. Berençedän, 2008 yılda prezident saylawları. Yaña patşanıñ nindi uylar belän kiläçägen berkem dä äytä almıy. İkençedän isä Rusiäneñ iñ zatlı tovarı - neft'neñ 2010 yılda niçegräk satılası da bilgele tügel. Ä xökümättägelär sanap çığarğança, 2010 yılda “ana kapitalı”na 131 milliardtan da artıq aqça kiräk bulaçaq. Aldağı yıllarda tağı da kübräk buluı mömkin.

Al'bina Zäynulla

XS
SM
MD
LG